काठमाडौं । प्रधानमन्त्री केपी शर्मा ओलीले झापा जिल्लाको दमकबाट अन्य पालिकासँग जोडने चार पक्की पुलको उद्घाटन गर्नुभएको छ ।
प्रधानमन्त्री ओलीले कमल गाउँपालिकाको क्याम्पादेखि मङ्गलबारे जोड्ने कमल खोलामा निर्मित पुल, दमक–१० लाई मोरङको उर्लाबारी जोड्ने मावा खोलामा निर्मित पुल र सोही वडाबाट कमल गाउँपालिका हुँदै गौरादह जोड्ने रतुवा खोलामा निर्मित पुलको एकै पटक उद्घाटन गर्नुभएको हो ।
दमक– १० सेतुमारीदेखि गौरादह– ५ बालुबथान जोडिने ३०० मिटर लामो रतुवा खोलामा ३३ करोड ५२ लाख रुपैयाँमा निर्माण भएको छ ।
मोरङको उर्लाबारीको राजघाट जोड्ने ११ मिटर चौडाइ तथा ४०० मिटर लम्बाइ रहेको पुल ५० करोड २० लाख २ हजार २०० रुपैयाँ निर्माण भएको हो । मावामा निर्माण भएको २५० मिटर लम्बाइ र ११ मिटर चौडाइ रहेको पुलको लागत ३० करोड २२ लाख ९१ हजार ७५० रुपैयाँ रहेको छ ।
दमकदेखि उर्लाबारी नगरपालिकास्थित आमबाडी जोड्ने मावा खोलाको अर्काे ११ मिटर चौडाइ र २०० मिटर लम्बाइ रहेको पुलको लागत २२ करोड ८७ लाख ५० हजार रुपैयाँ रहेको छ ।– प्रशिक्षार्थी पत्रकार
वि.सं.२०७७ फागुन १६ आइतवार १७:०३ मा प्रकाशित
