काठमाडौं । यातायात व्यवस्था विभागले स्मार्ट सवारी चालक अनुमती पत्र (लाइसेन्स) छपाईको कार्य तत्कालका लागि रोक्का गरेको छ ।
कार्ड अभाव भएपछि विभागले अत्यावश्यक बाहेकका स्मार्ट सवारी चालक अनुमतिपत्र (लाइसेन्स) छपाइको काम रोकेको जानकारी गराएको छ ।
कार्ड सकिएपछि अत्यावश्यक बाहेकका कार्ड छपाइको काम रोकिएको विभागका प्रवक्ता लोकनाथ भुसालले जानकारी दिनुभयो । मंसिरपछि आवेदन दिइएका कार्ड छपाइको काम रोकेको उहाँको भनाइ छ । मंसिरसम्मका कार्ड छपाएर यातायात कार्यालयमा पठाइसकेको र अब विभागसँग ४० हजार थान मात्रै खाली कार्ड बाँकी रहेको भुसालको भनाइ छ ।
प्रवक्ता भुषालका अनुसार पुराना बाँकी रहेका, विदेश जाने लगायत अत्यावश्यक परेका व्यक्तिलाई मात्रै वितरण गर्ने तथा बाँकी एक डेढ महिना भित्र नयाँ कार्ड आउने र सहज हुने बताउनुभयो ।
विभागले २०७२ मङ्सिरदेखि कागजी लाइसेन्स वितरण रोकेर स्मार्ट लाइसेन्स वितरण गर्ने निर्णय गरेको थियो । जसअन्तर्गत हालसम्म विभागले २० लाख कार्ड छपाई गरी यातायात कार्यालयहरूमा पठाइसकेको छ ।– प्रशिक्षार्थी पत्रकार
वि.सं.२०७७ फागुन १८ मंगलवार ११:३९ मा प्रकाशित