काठमाडौं । यतिबेला अर्थमन्त्रालय तथा मातहतका निकाय आगामी आर्थिक वर्ष २०७८/०७९ को बजेटको निर्माणका लागि तिब्र रुपमा जुटेका छन् ।
यतिबेला राष्ट्रिय योजना आयोगले आगामी आवको बजेट निर्माणको लागि भन्दै बजेट तर्जुमा दिग्दर्शनमा भएको ढाँचा अनुसार मन्त्रालय एवं निकायलाई आवश्यक सुझाव र सिलिङ पठाउन पत्राचार गरिसकेको छ । आयोगले अर्थलाई आगामी आवको बजेटको सिलिङ समेत पठाइसकेको बताइएको छ ।
अर्थ मन्त्रालयलेको राजस्व परामर्श समितिको गैर कर राजस्व उप समितिले सूचना नै जारी गरेर आगामी आव २०७८÷०७९ को आर्थिक ऐन तथा बजेट तर्जुमा सन्दर्भमा गैर कर राजस्व प्रणाली सुधारका विषयमा नीतिगत र कानूनी सुधार, प्रकृयागत सरलीकरण सम्बन्धी सुझाव पठाउन आग्रह गरेको छ ।
उप समितिका अनुसार चैत १० गते भित्र आवश्यक सुझाव सम्बन्धित संघ संस्था, सरकारी निकाय तथा सरोकारवाला सबैलाई आग्रह गरेको छ । आगामी आवको बजेट लेखनको नेतृत्व गर्न अर्थमन्त्री पौडेलले मन्त्रालयको आर्थिक नीति विश्लेषण महाशाखा प्रमुख डा. रामप्रसाद घिमिरेलाई जिम्मेवारी दिनु भएको छ । डा. घिमिरेको संयोजकत्वमा बजेट लेखनकार्य सुरु भएको छ ।
घिमिरेको नेतृत्वको समूहमा राजस्व व्यवस्थापन महाशाखा प्रमुख रामेश्वर दंगाल, बजेट तथा कार्यक्रम महाशाखा प्रमुख धनीराम शर्मा र योजना, अनुगमन तथा मूल्यांकन महाशाखा प्रमुख सुमन दाहाल, अन्तर्राष्ट्रिय आर्थिक सहायता समन्वयन महाशाखा प्रमुख श्रीकृष्ण नेपाल रहनु भएको छ ।
वि.सं.२०७७ फागुन २७ बिहीवार १०:४१ मा प्रकाशित
