काठमाडौं । लघुवित्त सङ्घ नेपालको नयाँ कार्यसमिति चयन भएको छ । सङ्घका संस्थापक अध्यक्ष जगत पोखरेलको नेतृत्वमा नयाँ कार्यसमिति निर्विरोध चयन भएको हो ।
काठमाडौँमा भएको सङ्घको प्रथम साधारणसभाले उपाध्यक्षमा भगवती चौधरी र माणिकरत्न शाक्य, महासचिवमा बाबुराम विश्वकर्मा, सचिवमा अनन्तकुमार श्रेष्ठ र कोषाध्यक्षमा नरेश केसीलाई नै निर्वाचित गरेको छ ।
यस्तै सदस्यमा विमला उपाध्याय घिमिरे र किरण चौधरी निर्वाचित हुनुभएको छ । स्थापनाका बेला नौ सदस्यीय रहेको समिति विस्तार गरी ११ सदस्यीय बनाउने र बाँकी तीन जनापछि मनोनित गर्ने निर्णय पनि साधारणसभाले गरेको छ ।
सङ्घले प्रथम साधारणसभा तथा वार्षिकोत्सवका अवसरमा लघुवित्त क्षेत्रमा योगदान गरेका सातलाई सम्मान गरेको छ ।पत्रकारिताको माध्यमबाट लघुवित्त क्षेत्रमा योगदान पु¥याएको भन्दै संस्थाले पत्रकार जीवन भण्डारीलाई सम्मान गरेको हो ।
झण्डै दुई दशकदेखि पत्रकारितामा क्रियाशिल राष्ट्रिय समाचार समिति(रासस)का उपसम्पादक भण्डारीलाई सङ्घको स्थापना दिवसको अवसरमा शुक्रबार काठमाडाँैमा अर्थ सचिव शिशिर ढुङ्गानाले सम्मान गर्नुभयो ।
लघुवित्त वित्तिय संस्थाको उत्कृष्ट व्यवस्थापन गरेको भन्दै निर्धन उत्थान बैंकका प्रमुख कार्यकारी अधिकृत जनार्दनदेव पन्त र फस्ट माइक्रोफाइनान्सका प्रमुख कार्यकारी अधिकृत नुमनाथ पौडेललाई उत्कृष्ट सिइओ सम्मान प्रदान गरिएको छ ।
त्यसैगरी लघुवित्त क्षेत्रमा अध्ययन अनुसन्धानको माध्यमबाट योगदान गर्नु भएकाले त्रिभुवन विश्वविद्यालयका उपप्राध्यापक भरतसिंह थापालाई पनि सम्मान गरिएको छ ।
सङ्घले लघुवित्त वित्तीय संस्थामा सेवाग्राहीको रुपमा आबद्ध भइ आफ्नो आर्थिक तथा सामाजिक उत्थान गर्नुभएका तीन महिलालाई प्रोत्साहन स्वरुप सम्मान गरेको अध्यक्ष पोखरेलले जानकारी दिनुभयो ।
उहाँले लघुवित्त क्षेत्रको संवद्र्धन गर्न र बिक्रेता न्यूनीकरण गर्न योगदान गरेका व्यक्तिलाई सङ्घले हरेक वर्ष प्रोत्साहन गर्ने योजना बनाएको पनि बताउनुभयो ।
देशभरी रहेका लघुवित्त वित्तीय संस्थालाई सङ्गठित गरी यस क्षेत्रका समस्याको समाधान गर्दै सेवालाई प्रभावकारी र उपयोगी बनाउने उद्देश्यले गत वर्ष सङ्घको स्थापना भएको हो ।
अध्यक्ष पोखरेलले लघुवित्तका विकृति विसङ्गति रोक्न, नीतिगत विषयमा बल पु¥याउन र लगानीकर्ताको लगानी सुरक्षित गराउन सङ्घको स्थापना गरिएको जानकारी दिनुभयो ।
सरकार र राष्ट्र बैंकसँग समन्वय गरेर अघि बढ्न, व्यवस्थापन र कर्मचारीको मनोबल बढाउने काममा लाग्न पनि सस्था आवश्यक रहेको उहाँको भनाइ थियो ।
लघुवित्त क्षेत्रलाई प्रभावकारी बनाउन वित्तीय साक्षरता अत्यावश्यक रहेकाले घरघरमा पुगेर वित्तीय साक्षरता दिनुपर्नेमा उपाध्यक्ष चौधरीले जोड दिनुभयो ।
लघुवित्तले गरेको राम्रो काममा पनि राज्यलगायत सरोकारवालाको हेर्ने नजर सन्तोषजनक नरहेको महासचिव विश्वकर्माको अनुभव छ ।
माइक्रोफाइनान्स मर्ज हुने क्रम चलिरहेकाले अहिले ७८ वटा माइक्रोफाइनान्स रहेको र ४० वटा सङ्घमा आबद्ध रहेको सचिव अनन्तकुमार श्रेष्ठले जानकारी दिनुभयो ।
वि.सं.२०७७ चैत ८ आइतवार ११:१९ मा प्रकाशित
