काठमाडौं । पछिल्लो समयमा अनलाइनबाट सेयर कारोबार गर्ने लगानीकर्ताको संख्या निकै बढेको छ । नेपाल स्टक एक्सचेन्ज (नेप्से)का अनुसार अनलाइनको यूजरनेम र पासवर्ड लिने सेयर लगानीकर्ताको संख्या ४ लाख ९९ हजार ६९३ जना पुगेका छन् ।
जसमा अनलाइनबाटै सेयर कारोबार गर्ने सकृय लगानीकर्ताको संख्या २ लाख ४३ हजार ३४८ जना रहेका छन् । नेप्सेका अनुसार ६ लाख २७ हजार ६६२ जना लगानीकर्ता सेयर बजारमा सकृय रहेका छन् । सकृय लगानीकर्तामा अनलाइन अफलाइन दुवै समावेश गरिएको छ ।
नेप्सेका अनुसार सबैभन्दा बढी नाशा सेक्युरिटिजबाट ४८ हजार ४१३ जनाले अनलाइनको यूजरनेम र पासवर्ड सेवा लिएका छन् । त्यस्तै सानी सेक्युरिटिजबाट ३० हजार ८५६ जना, मिदास स्टक ब्रोकिङ कम्पनीबाट २३ हजार ६०५ जना, भिजन सेक्युरिटीजबाट २१ हजार २०९, दिपशिखा धितोपत्र कारोबार कम्पनीबाट २० हजार ६९६ जनाले अनलाइनको यूजरनेम र पासवर्ड सेवा लिएका छन् । सबैभन्दा थोरै सगरमाथा सेक्युरिटिजबाट ८७१ जनाले अनलाइनको यूजरनेम र पासवर्ड सेवा लिएको नेप्सेको भनाइ छ ।
विश्वब्यापी रुपमा सुरु भएको कोरोनाको महामारीपछि सेयर कारोबार अनलाइनबाट गर्ने क्रम निकै बढेको छ । तत्कालिन समयमा ब्रोकर कार्यालय नखुल्ने भएका कारण घरबाटै अनलाइन कारोबार गर्नु पर्ने भएकोले अनलाइनको यूजर नेम र पासवर्ड लिनेको संख्या निकै बढेको छ ।
वि.सं.२०७७ चैत ८ आइतवार १४:२४ मा प्रकाशित