काठमाडौं । चालु आर्थिक वर्षको आठ महिनामा सुनको मूल्य ६ हजार ५ सय रुपैयाँले सस्तिएको छ ।
चालु आवको पहिलो महिनाको पहिलो कारोबार दिनदेखि फागुन अन्त्यसम्म आउँदा छापावाला सुनको मूल्य ६ हजार ५ सय रुपैयाँले घटेको हो ।
नेपाली बजारमा साउन महिनाको पहिलो कारोबार दिन ९२ हजार ७ सय रुपैयाँमा किनबेच भएको सुनको भाउ फागुन मसान्त (फागुन २८ गते) सम्म आउँदा ८६ हजार २ सय रुपैयाँमा झरेको नेपाल सुनचाँदी व्यवसायी महासंघले जनाएको छ ।
साउन महिनामै सुनको मूल्य उर्लिएर ऐतिहासिक रेकर्ड बनाएको थियो । उक्त महिनामा छापावाला सुनको मूल्य प्रतितोला १ लाख रुपैयाँ कटेको थियो । महासंघका अनुसार साउन २३ गते सुनको भाउ १ लाख १ हजार ४ सय रुपैयाँ कायम भई नयाँ रकर्ड बनाएको हो ।
उक्त महिनामा लगातार पाँच कारोबार दिन सुनको भाउ एक लाखभन्दा तल आएन । साउन २१ गतेदेखि २७ गतेसम्म एक लाख रुपैयाँकै वरिपरी कारोबार भएको महासंघले जनाएको छ ।
हालसम्म सुनको भाउ १ लाख ३ हजार ५ सय रुपैयाँ (साउन २३ गते) पुगेको छ । जुन अहिलेसम्मकै उच्च हो । त्यसपछि विस्तारै ओरालो लाग्न थालेको हो । यसक्रममा फागुन अन्त्यसम्म आउँदा ८६ हजार २ रुपैयाँमा झरेको महासंघले जनाएको छ ।
त्यसैगरी पछिल्लो आठ महिनामा चाँदीको मूल्य २ सय ६५ रुपैयाँले वृद्धि भएको छ । चालु आवको पहिलो महिनाको पहिलो कारोबार र फागुन मसान्तसम्मको तुलनामा चाँदीको भाउ २ सय ६५ रुपैयाँले बढेको महासंघले जनाएको छ ।
साउन गतेका दिन तोलामा १ हजार ५ रुपैयाँमा किनबेच भएको चाँदीको भाउ फागुन अन्त्यसम्म आउँदा १२ सय ७० रुपैयाँ पुगेको छ ।
यसैविच आज (चैत ८ गते) साताको पहिलो कारोबार दिन सुनको मूल्य बढेको छ । आज छापावाला सुनको मूल्य तोलामा ५ सय रुपैयाँले बढेको हो ।
नेपाली बजारमा छापावाला सुनको भाउ तोलामा ८७ हजार २ सय रुपैयाँ निर्धारण गरिएको नेपाल सुनचाँदी व्यवसायी महासंघले जनाएको छ ।
अघिल्लो कारोबार दिन प्रतितोला ८६ हजार ७ रुपैयाँमा किनबेच भएको थियो । आज तेजावी सुनको मूल्य ८६ हजार ७५० रुपैयाँ तोकिएको छ ।
यस्तै, आज चाँदीको मूल्य पनि सामान्य बढेको छ । आज प्रतितोला ५ रुपैयाँले वृद्धि भएको चाँदीको भाउ १२ सय ८० रुपैयाँ छ । शुक्रवार तोलाको १२ सय ७५ रुपैयाँमा कारोबार भएको महासंघले जनाएको छ ।
वि.सं.२०७७ चैत ८ आइतवार १५:१४ मा प्रकाशित