काठमाडौं । आन्तरिक राजस्व विभागले झुट्टा तथा नक्कली मूल्य अभिवृद्दि कर विजक प्रयोग गरी राजस्व छलि गर्ने २ जनालार्ई मुद्दा दायर गरेको छ ।
पर्सा जिल्लाको बेलवा गाविस-५ का अभिनास इण्टरनेश्नल प्रालिका सञ्चालक प्रविन्द्र साहबाट ५ करोड २९ लाख ८५ हजार १२९ रुपैयाँ विगो असुल गरी जरिवाना र कैद मागदावी लिई उच्च अदालत पाटनमा मुद्दा दर्ता गरिएको विभागले जनाएको छ ।
साह तथा उक्त फर्मको बैंक खाता सञ्चालक मो। जाबिर अन्सारी समेतले मालबस्तु स्थानीय खरिद तथा आयात नगरी, झुट्टा खरिद देखाई विभिन्न फर्महरूलाई विक्री बीजक जारी गरी उक्त फर्महरूबाट विक्री रकम भुक्तानी लिएकोदेखिएको छ ।
उक्त बीजक मार्फत असुल गरेको मूल्य अभिवृद्धि कर रकम सरकारी कोषमा दाखिला नगरेको र विभिन्न फर्महरूलाई नक्कली एवं झुट्टा बीजक उपलब्ध गराई जालसाजी गरी प्रपञ्च रची मूल्य अभिवृद्धि कर र आयकर समेतको राजस्व चुहावटको कसूर गरेको देखिएको छ ।
वि.सं.२०७७ चैत २६ बिहीवार ११:१२ मा प्रकाशित
