काठमाडौं । माछापुच्छ्रे बैंकले नेपालगञ्जको पवित्र स्थल वागेश्वरी मन्दिरमा क्यूआर कोड सेवा सुरु गरेको छ ।
नेपाल राष्ट्र बैंकले लिएको नगदरहित कारोबार नीतिलाई कार्यान्यवन गर्ने गराउने मुख्य उद्धेश्य तथा आम नागरिक माझ डिजिटल बैंकिङ्ग सेवाको पहुँच विस्तार गर्न बैंकले उक्त सेवा विस्तार गरेको हो ।
नेपाल राष्ट्र बैंकका गभर्नर महाप्रसाद अधिकारीले नेपालगञ्ज स्थित पवित्र वागेश्वरी मन्दिरमा क्युआर कोड मार्फत भेटी चढाई उक्त सेवाको सुरुवात गर्नु भएको हो ।
सोही अवसमार गभर्नर अधिकारीले क्यूआर कोड सेवा अत्यन्त सरल र सुरक्षित रहेको र यो सेवाको प्रयोगबाट नयाँ नोटको छपाईका लागि हरेक वर्ष देशबाट बाहिरिने ठुलो धनराशी कटौती हुने हुदाँ सरकारलाई समेत यसबाट प्रत्यक्ष लाभ पुग्नेमा जोड दिनुभयो । माछापुच्छ्रे बैंकले उक्त कोड सेवा भुक्तानी प्रणालीमा आधुनिकीकरणको सुरुवात गरेको भन्दै यस प्रणालीले कारोबारमा पारदर्शिता ल्याउने अधिकारीले बताउनुभयो ।
सोही अवसरमा नेपालगञ्ज उपमहानगरपालिकाका मेयर डा. धवलशमशेर राणाल नेपालगञ्ज स्थित वागेश्वरी मन्दिरमाआधुनिक प्रणालीमा आधारित कोड सेवाको सुरु गरेकोमा बैंकलाई धन्यवाद ज्ञापन गर्नुभयो ।
यस्तै उक्त कार्यक्रममा बैंकका अध्यक्ष डा. विरेन्द्र प्रसाद महतोले मन्दिरमा सुरु गरिएको क्युआर कोड सेवाले डिजीटल कारोबारलाई हरेक तह र तप्कासम्म पुर्याउने बैंकको अभियानमा मद्दत पुग्ने विश्वास व्यक्त गर्नुभयो ।
सोही अवसरमा बैंकका प्रमुख कार्यकारी अधिकृत (सीईओ) सन्तोष कोइराला, बांके जिल्लाका प्रमुख अधिकारी शिवराम गेलाल लगायत बोल्नुभएको थियो ।
आफुले प्रयोग गरेको बस्तु तथा सेवाको आफ्नै बैंक खाता मार्फत डिजिटल भुक्तानी गर्दा ग्राहकको साथै व्यापरीलाई समेत खुद्रा पैसाको झन्झट नहुने, बचत गर्ने बानिको विकास हुने, व्यापारीलाई हरेक दिन आफुले गरेको व्यापारबाट आएको पैसा जम्मा गर्न बैंकसम्म जानु नपर्ने लगायतका थुपै सुविधाहरुको कारणले गर्दा क्यूआर कोड सेवाको पछिल्लो समय सवै वर्ग र क्षेत्रमा आर्कषण बढ्दै गएको छ ।
यहि कुरालाई मध्यनजर गर्दै बेंकले पछिल्लो समय देशका धेरैजसो स्थानहरुमा आक्रमक रुपमा यो सेवा प्रदान गर्दै आइरहेको छ ।
बैंकले देशका विभिन्न स्थानहरुमा रहेका तरकारी बजार, हाटबजार, होमस्टे, मन्दिर, रेष्टुरेन्ट, कस्मेटिक पसलहरु, यातायात सेवाहरु लगायतका विभिन्न व्यसायीहरुलाई प्रदान गरेको क्यूआर कोड सेवाले आम ग्राहकलाई डिजिटल कारोबार गर्न प्रोत्साहन गरिरहेको छ ।
डिजिटल बैंकिङ्ग सेवाको पहुचँ नपुगेका अन्य धेरै स्थान र क्षेत्रमा पनि आक्रामक रुपमा सेवा विस्तार गर्ने र आगामी दिनमा पनि यो क्रमलाई निरन्तरता दिदै जाने बैंकले जनाएको छ ।
वि.सं.२०७८ वैशाख ३ शुक्रवार १४:४९ मा प्रकाशित