काठमाडौं । धितोपत्र बोर्डका अध्यक्ष भिष्मराज ढुंगानाले सेयर लगानीकर्तालाई हल्लाको पछि नलागि सत्य तथ्य सूचनाको आधारमा सुझ बुझपूर्ण लगानी गर्न सुझाव दिनु भएको छ ।
उहाँलेले सबैलाइै पूँजी बजारमा उत्साहपूर्वक सहभागिताको लागि सुझाव दिनु भएको हो । समृद्ध नेपाल लगानी समूहद्वारा आयोजित छलफल तथा अन्तर्क्रियात्मक कार्यक्रममा यस्तो बताउनु भएको हो ।
पूँजी बजारमा आवद्ध अपांगता भएका सर्वसाधारण लगानीकर्ताको प्रतिनिधित्व रहेको उक्त समुहले आयोजना गरेको कार्यक्रममा उहाँले पूँजी बजार सबैको भएको भन्दै अहिलसम्म कुल जनसंख्याको करिब १० प्रतिशत सर्वसाधारण पूँजी बजारमा सहभागी भएको जानकारी गराउनु भयो । अपांगता भएका सर्वसाधारणको समेत सहभागी भएकोमा खुशी व्यक्त गर्नुभयो ।
उहाँले पूँजी बजारमार्फत् देशको आर्थिक विकासका लागि अपांगता भएका सर्वसाधारणको पूँजी बजारप्रतिको चासो तथा सहभागिता आगामी दिनमा थप उत्साहमूलक हुनुपर्ने धारणा राख्नुभयो । उहाँले अपांगता भएका व्यक्तिहरूको बजार प्रवेशमा भएका प्रक्रियागत कठिनाईहरूको सम्बोधन गर्न र बजारमा प्रयोगमा रहेका प्रविधिहरू अपांगमैत्री बनाउदै लैजान आवश्यक भएको बताउनुभयो ।
सरकारले समेत विकासका सबै मामिला र आर्थिक गतिविधिहरूमा सबै पक्षको समान सहभागिता र अवसरको प्रत्याभूति हुने गरी नीति तथा कार्यक्रमको तर्जुमा तथा कार्यान्वयन गर्दै आएकोमा पूँजी बजारमा समेत यस्तो सहभागिता रहेकोमा चासो एवं प्राथमिकता रहेको बताउनुभएको छ ।
वि.सं.२०७८ वैशाख ५ आइतवार १३:५० मा प्रकाशित
