काठमाडौं । हरेक सूचिकृत कम्पनीले पुसमसान्तसम साधारणसभा गरिसक्नुपर्ने हुन्छ । तर कतिपय संस्थाले समयमा नै साधारणसभा नगरेर लगानीकर्तालाई धेरै नै अन्यौलता सृजना गरेका छन् ।
यसअघि समयमा नै साधारणसभा नगरेका कम्पनीले अब कोरोनाका कारण तत्काल साधारणसभा गर्न सक्ने सम्भावना न्यून रहेको देखिएको छ ।
वैशाखको अबका बाँकी दिनमा ५ कम्पनीको साधारणसभा गर्नको लागि समय समेत तोकि सकेको थियो । कोरोनाका कारण ती कम्पनीको साधारणसभा समयमा नै हुने वा नहुनेमा आशंका देखिन थालेको छ ।
अहिलेसम्म साधारणसभाका लागि गोर्खाज फाइनान्स, रिलयान्स फाइनान्स, घलेम्दी हाइड्रो, जनरल इन्स्योरेन्स र बेष्ट फाइनान्सले समय तय गरिसकेका छन् । यद्यपि, बेष्ट फाइनान्सले भने बैशाख ३१ गते गर्ने भनेको साधारणसभा तत्कालको लागि स्थगन गर्ने भएको छ ।
आज सूचना निष्काशन गर्दै कोभिड–१९ को नयाँ संक्रमणको कारण सरकारबाट निषेधाज्ञा जारी गरेको अवस्था र विषम परिस्थितिलाई मध्यनजर गर्दै अब अर्को निर्णय र सूचना प्रकाशित नभएसम्मका लागि सभा स्थगन गरेको जनाएको छ ।
बाँकी चार कम्पनीले भने निषेधाज्ञाको समयमा तय गरेको सभा के गर्छन् भन्ने विषयमा अहिलेसम्म कुनै प्रतिक्रिया जनाएका छैनन् । यी कम्पनीहरुले भौतिक दुरी कायम गरेर समेत सभा गर्न सक्ने अवस्था छैन । भर्चुअल रुपमा गर्ने वा त्यो पनि स्थगन गर्ने भनेर कुनै जानकारी गराएका छैनन् ।
वैशाख २१ गते अर्थात मंगलबार गोर्खाज फाइनान्सले २६ औँ साधारणसभा बोलाएको छ । यसको लागि वैशाख ६ देखि २१ गतेसम्म बुक क्लोज गर्ने जनाएको छ ।
यस्तै, वैशाख २२ गते बुधवार रिलायन्स फाइनान्सले साधारणसभा बोलाएको छ । उक्त सभामा आर्थिक वर्ष २०७६-७७ को मुनाफाबाट १० प्रतिशत बोनस र कर प्रयोजनार्थ ०.५३ प्रतिशत नगद लाभांश पारित गर्दैछ । यसको लागि बैशाख १० गते बुक क्लोज गरिसकेको छ ।
त्यसैगरि घलेम्दी हाइड्रोको सातौँ साधरणसभा वैशाख २३ गते गर्ने भएको छ । सभाले लेखा परीक्षकको नियुक्ति र निजको पारिश्रमिक तोक्ने प्रस्ताव लैजाँदै छ । सभा प्रयोजनका लागि बैशाख १६ गतेदेखि २३ गतेसम्म बुक क्लोज गर्ने भएको छ ।
जनरल इन्स्योरेन्स कम्पनीले नेपालले वैशाख २६ गते साधारसभा गर्ने मिति तय गरेको छ । सभामा लेखा परीक्षकको नियुक्ति र निजको पारिश्रमिक तोक्ने प्रस्ताव लैजाँदै छ । यसको लागि वैशाख १० गतेदेखि २६ गतेसम्म बुक क्लोज गर्दैछ ।
वि.सं.२०७८ वैशाख १९ आइतवार १५:१७ मा प्रकाशित