काठमाडौं । निजी क्षेत्रमा काम गर्ने श्रमिकले साउन १ गतेबाट न्यूनतम १५ हजार रुपैयाँ तलब पाउने भएका छन् ।
सरकारले राजपत्रमा प्रकाशित गरेको सूचना अनुसार अब श्रमिकले न्यूनतम तलब ९ हजार ३८५ र महंगी भत्ता ५ हजार ६१५ रुपैयाँ सहित १५ हजार तलब पाउने भएका छन् । अब मजदुरले दैनिक ५७७ रुपैयाँ पारिश्रमिक पाउनु पर्ने छ । यो भनेको प्रतिघन्टा ७७ रुपैयाँ हो ।
यसअघि प्रधानमन्त्री केपी शर्मा ओलीले अन्तरर्राष्ट्रिय श्रमिक दिवसका अवसरमा आगामी आर्थिक वर्षदेखि श्रमिकको न्यूनतम पारिश्रमिक मासिक १५ हजार पुर्याउने घोषणा गर्नु भएको थियो । सोही अनुसार नै राजपत्रमा सूचना नै प्रकाशित भएको छ ।
प्रकाशित सूचना अनुसार उक्त पारिश्रमिक चिया बगान बाहेकका श्रमिकको लागि मात्रै हो । उक्त पारिश्रमिकको अतिरिक्त श्रम ऐन, २०७४, योगदानमा आधारित सामाजिक सुरक्षा ऐन, २०७४ र प्रचलित कानूनबमोजिम श्रमिकले पाउने सञ्चयकोष र उपदान लगायत सुविधा रोजगारदाताले दिनुपर्ने छ ।
वि.सं.२०७८ वैशाख २१ मंगलवार ०९:५९ मा प्रकाशित