काठमाडौं । नेपाल बैंकले ३ अर्ब ५० करोड रुपैयाँको ३५ लाख कित्ता ऋणपत्र निष्काशन गरेको छ ।
बैंकले ‘८.५० % नेपाल बैंक ऋणपत्र २०८७’ जारी गरेको हो । ३५ लाख कित्तामध्ये २१ लाख कित्ता बैंकले विभिन्न संघ संस्थालाई बिक्री गर्ने भएको छ भने बाँकी १४ लाख कित्ता सर्वसाधारणलाई छुट्याएको छ ।
१४ लाख कित्तामा सामूहिक लगानी कोषका लागि १५ हजार कित्ता बाँडफाँट गरिएको छ । सर्वसाधारणले १३ लाख ८५ हजार कित्तामा आवेदन दिन सक्नेछन् । नेपाल बैंकले १० वर्ष अवधिको लागि वार्षिक ८.५० प्रतिशत ब्याजदरमा ऋणपत्र निष्काशन गरेको छ । प्रतिइकाई १ हजार रुपैयाँ दरले न्यूनतम २५ देखि अधिकतम ३ लाख कित्तासम्म आवेदन दिन सकिनेछ ।
आवेदन दिँदा सी-आस्वा सदस्य बैंक तथा वित्तीय संस्था र मेरो सेयरबाट पनि आवेदन दिन सकिने छ । छिटोमा वैशाख २६ गते र त्यो अवधिमा बिक्री नभएमा जेठ ५ गतेसम्म आवेदन दिन सकिने रहेको छ ।
वि.सं.२०७८ वैशाख २२ बुधवार १२:३३ मा प्रकाशित