बागलुङ । बागलुङमा बैंक तथा वित्तीय संस्थाहरुले आलोपालो गरी सेवा प्रदान गर्ने भएका छन् । कोरोना संक्रमणको जोखिम हुन नदिन सदरमुकाममा सञ्चालित बैंक तथा वित्तीय संस्थाले आलोपालो सेवा दिने भएका हुन् ।
सबै बैंक एकसाथ खुल्दा सेवाग्राहीको भीडभाड हुने र कोरोना संक्रमणको जोखिम बढ्ने हुँदा आलोपालो गरेर बैंक खोल्ने निर्णय गरिएको बताइएको छ ।
आजैदेखि लागू हुने गरी नेपाल बैंक हप्ताको तीन दिन र अन्य बैंक तथा बीमा कम्पनी आलापालो गरेर हप्ताको दुई दिन मात्र खुल्ने छन् । नेपाल बैंकले आइतवार, मंगलवार र बिहीवार सेवा दिने बताइएको छ ।
सदरमुकाममा २८ ओटा वाणिज्य/विकास बैंक र दर्जनभन्दा बढी बीमा कम्पनी सेवारत छन् । न्यून कर्मचारीको उपस्थितिमा जनस्वास्थ्य मापदण्डको पूर्ण पालना गरी बिहान ११ बजेदेखि दिउँसो १ बजेसम्म मात्र सेवा सञ्चालन गर्ने निर्णय भएको जिल्ला प्रशासन कार्यालयले जनाएको छ ।
प्रभु बैंकले सरकारी कार्यालयसँग समन्वय गरी आवश्यकता अनुसार राजस्व काउण्टर सञ्चालन गर्ने बताइएको छ । बागलुङ नगरपालिकामा मंगलवारदेखि १० दिनसम्मलाई निषेधाज्ञा जारी गरिएको छ ।
वि.सं.२०७८ वैशाख २४ शुक्रवार ११:४० मा प्रकाशित