काठमाडौं । नेशनल लाइफ इन्स्योरेन्स कम्पनीले चालु आर्थिक वर्षको तेस्रो त्रैमासिक वित्तीय विवरण सार्वजनिक गरेको छ ।
कम्पनीले सार्वजनिक गरेको वित्तीय विवरणअनुसार तेस्रो त्रैमासमा ३२ करोड २५ लाख ७० हजार रुपैयाँ नाफा कमाएको छ ।
जुन गत वर्षको सोही अवधिको तुलनामा २.२० प्रतिशतले मात्र बढी हो । गत वर्षको तेस्रो त्रैमासमा कम्पनीले ३१ करोड ५६ लाख २१ हजार रुपैयाँ नाफा कमाएको थियो ।
कम्पनीले चालु आवको तेस्रो त्रैमासमा ८ अर्ब ९५ करोड ४९ लाख ६० हजार रुपैयाँ कुल बीमाशुल्क आर्जन गरेको छ । कम्पनीको कुल बीमाशुल्क आर्जन गत वर्षको सोही अवधिको तुलनामा ५६.३७ प्रतिशतले वृद्धि भएको हो । गत वर्षको तेस्रो त्रैमासमा कम्पनीको कुल बीमाशुल्क आर्जन रकम ५ अर्ब ७२ करोड ६६ लाख २६ हजार रुपैयाँ रहेको थियो ।
कम्पनीको कुल कायम रहेको बीमालेखको संख्या ९ लाख १७ हजार ९५० रहेको छ । तेस्रो त्रैमाससम्म कम्पनीको कुल दावी भुक्तानी रकम २ अर्ब ९४ करोड ६६ लाख १८ हजार रुपैयाँ रहेको छ । भुक्तानी हुन बाँकी दावी रकम भने ३८ करोड ७१ लाख ५३ हजार रुपैयाँ रहेको छ ।
कम्पनीको चुक्तापूँजी ३ अर्ब ३९ करोड ८ लाख ८९ हजार रुपैयाँ पुगेको छ । कम्पनीको जगेडा तथा कोषमा ८१ करोड १७ लाख २३ हजार रुपैयाँ रहेको छ ।
यस्तै, जीवन बीमा कोषमा ४० अर्ब २१ करोड ७९ लाख ९८ हजार रुपैयाँ र महाविपत्ती जगेडामा २९ करोड ३८ हजार रुपैयाँ रहेको छ ।
कम्पनीको प्रतिसेयर आम्दानी १२ रुपैयाँ ६८ पैसा, प्रतिसेयर नेटवर्थ १३२ रुपैयाँ ०१ पैसा रहेको छ ।
वि.सं.२०७८ वैशाख २९ बुधवार ११:५६ मा प्रकाशित