काठमाडौं । हिमालयन बैंक र नेपाल इन्भेष्टमेन्ट बैंक आपसमा मर्जरमा जानको लागि सम्झौता पत्रमा हस्ताक्षर भएको छ ।
बिहीबार दुवै बैंकका अध्यक्ष समक्षदारी पत्रमा हस्ताक्षर गर्नु भएको हो ।
नेपालको वित्तिय क्षेत्रलाइ सबल तथा सक्षम बनाउने उद्देश्यका साथ नेपाल राष्ट्र बैंकले अगाडि सारेको मर्जर-एक्वीजिसन नीतिको अनुसरण गर्दै नेपाल इन्भेष्टमेण्ट बैंक र हिमालयन बैंकबीच एक आपसमा गाभ्न गाभिनको लागि प्रारम्भिक समझदारी पत्रमा इन्भेष्टमेण्ट बैंकका अध्यक्ष पृथ्वी बहादुर पाँडे तथा हिमालयन बैंकका अध्यक्ष तुलसी प्रसाद गौतले हस्ताक्षर गर्नु भएको छ । यो सँगै मर्जरको लागि औपचारिक रुपमा शुभारम्भ भएको छ ।
एकआपसमा गाभिए पछि वित्तीय क्षेत्रमा थप उर्जा प्रदान गरी देश कै सबैभन्दा ठूलो वाणिज्य बैंक बन्नुका साथै यसले राष्ट्र बैंकको नीतिलाई समेत थप उत्साह प्रदान गरी अन्य बैंकहरुलाई समेत मर्जरको लागि प्रेरित गर्ने देखिएको छ ।
मजर पछि बैंकको नाम हिमालयन एण्ड नेपाल इन्भेष्टमेण्ट बैंक लिमिटेड हुने छ भने संचालक समितिको अध्यक्षको रूपमा पृथ्वी बहादुर पांडे तथा प्रमुख कार्यकारी अधिकृतको रुपमा अशोक शमसेर राणा हुनुहुनेछ ।
त्यसैगरी मर्जरपछि बन्ने बैंकको संचालक समितिमा बैंकको तर्फबाट ३-३ जना संचालक नियुक्त हुने र नयाँ संचालक समितिले सचालकको नियुक्त गरी जम्मा ७ जनाको संचालक समिति हुनेछ । मर्जरपछि सबैभन्दा सबल र ठूलो बैक हिमालयन एण्ड नेपाल इन्भेष्टमेण्ट बैंक बन्ने छ । बैंकले आगामी दिनमा लगानीकर्तालाई राम्रो प्रतिफल दिने बताइएको छ ।
वि.सं.२०७८ वैशाख ३० बिहीवार १६:२६ मा प्रकाशित
