काठमडौं । निजी अस्पताललाई १५ दिनभित्र आफ्नै अक्सिजन प्लान्ट जडान गर्न भन्दै स्वास्थ्य तथा जनसंख्या मन्त्रालयले दिएको निर्देशनप्रति एशोसियसन अफ प्राइभेट हेल्थ इन्स्टिच्युसन अफ नेपाल (अफिन)ले ध्यानाकर्षण गराएको छ ।
मन्त्रालयले बुधवार कम्तीमा एक सय बेड सञ्चालन गरेका निजी अस्पताललाई १५ दिनभित्र आफ्नै अक्सिजन प्लान्ट जडान गर्न भनेर दिएको निर्देशनप्रति अफिनले गम्भीर ध्यानाकर्षण भएको जनाएको छ ।
अफिनद्वारा जारी विज्ञप्तिमा भनिएको छ,– “कोभिड–१९ महामारीका कारण देशभरि नै अक्सिजनको अभाव भएको बारेमा हामी सबै अवगत छौँ। र, यो असहज अवस्थाप्रति गम्भीर पनि छौँ। सीमित साधन–स्रोतका अतिरिक्त निजी अस्पतालहरूले आफ्नो सम्पूर्ण ध्यान कोभिड संक्रमित बिरामीहरूको उपचारसेवामा केन्द्रित गरिरहेको अवस्थामा अत्यावश्यक साधनस्रोत राज्यले उपलब्ध गराउनुको साटो यस्तो गैर जिम्मेवारपूर्ण निर्णयले राज्य अहिलेको विषम परिस्थितिमा कसरी संचालन भैरहेछ भन्ने स्पष्ट हुन्छ ।”
लगभग देशभर नै निषेधाज्ञा जारी भएको र अन्तराष्ट्रिय हवाईसेवा पनि बन्द भएकाले मन्त्रालयले तोकेको समयमा तत्काल जडान गर्न नसक्ने अफिनले विज्ञप्तिमार्फत जनाएको छ ।
“अक्सिजन प्लान्ट भनेको बजारबाट टप्प टिपेर जडान गर्ने उपकरण हैन । विश्वको कुनै पनि उद्योगले खरिद सम्झौतापछि ३ महिना नभै प्लान्ट तयार गरिदिने अवस्था रहँदैन । प्लान्ट भित्रिएपछि सोको जड़ान गर्न कम्तीमा १५ दिन लाग्ने हुन्छ ।” विज्ञप्तिमा उल्लेख छ ।
देशैभरी अक्सिजन अभावको वर्तमान समस्या समाधान गर्न सरकारको तर्फबाट विशेष कदमहरु चालिनुपर्ने र उक्त प्रयसमा सरकारको कदममा कदम मिलाई साथ दिन निजी अस्पतालहरु तयार रहेको अफिनले जनाएको छ ।
साथै कोभिडका कारण देशले भोग्नुपरेका समस्या समाधानका लागि आफ्नो तहबाट सम्पूर्ण सामर्थ्यका साथ योगदान गर्न निजी अस्पतालहरू अहोरात्र खटिरहेको र आगामी दिनमा पनि यस महामारीसँग जुध्न सकारले चालेका कदमहरूलाई साथ दिन हामी हरदम तयार रहेको जनाएको छ ।
वि.सं.२०७८ वैशाख ३० बिहीवार १८:२७ मा प्रकाशित
