काठमाडौं । नेपाल उद्योग परिसंघले नियमनकारी निकायले परिपक्व भूमिका खेल्नुपर्नेमा जोड दिएको छ ।
नेपाल धितोपत्र बोर्डले लगानीका लागि जोखिमयुक्त भन्दै सूचीकृत कम्पनीको सूची सार्वजनिक गर्दा लगानीकर्ताको मनोबल घट्न गइ समग्र पुजीँबजारमा नकारात्मक सन्देश प्रवाह भएको जनाएको छ । उपप्रधान तथा अर्थमन्त्री विष्णुप्रसाद पौडेलसँगको भेटमा परिसंघले यस्तो बताएको हो ।
अर्थमन्त्रीसँगको भेटमा अध्यक्ष सतिशकुमार मोरले आगामी आर्थिक वर्षमा लक्ष्य अनुसारको आर्थिक वृद्धिदर हासिलगर्ने गरी आर्थिक क्रियाकलाप चलायमान बनाउन सरकार समक्ष आग्रह गरेको छ । अध्यक्ष मोरले बजेटमा लक्षित ६.५ प्रतिशतको आर्थिक वृद्धिदर हासिलगर्न सकिने भन्दै त्यसका लागि आर्थिक गतिविधि विस्तार गर्नुपर्ने बताउनुभयो ।
भेटमा अध्यक्ष मोरले बजेटमा उल्लेखित धेरै विषय तत्काल कार्यान्वयनका लागि मौद्रिक नीति मार्फत व्यवस्था गर्नुपर्नेमा जोड दिनुभयो । उहाँले बजेटमा जस्तै मौद्रिक नीतिमा पनि निजी क्षेत्रका समस्या सम्बोधन हुने विश्वास व्यक्त गर्नुभयो ।
नेपाल राष्ट्र बैंकले विदेशी लगानी तथा विदेशी ऋण व्यवस्थापन विनियमावली २०७८ मार्फत् प्रत्येक निर्णय ७ देखि १५ दिनमा गरिसक्ने व्यवस्था गरेको भन्दै अध्यक्ष मोरले सरकारले प्रत्येक मन्त्रालयकाकाम यसरी सम्पन्नगर्ने गरी समय तोक्नुपर्ने बताउनुभयो । उहाँले सरकारी निकायका निर्णय प्रक्रिया छिटो र छरितो हुनुपर्ने भन्दै त्यसले सेवाप्रवाहमा सहजताल्याउने उल्लेख गर्नुभयो ।
कोभिड–१९ को भ्याक्सिन निजी क्षेत्रका उद्योगहरुमा कार्यरत मजदूर तथा कर्मचारीलाई प्राथमिकताका साथ उपलब्ध गराउन पनि परिसंघले आग्रह गरेको छ । यसैगरी मापदण्ड बनाएर निजी क्षेत्रलाई भ्याक्सिन आयातको अनुमति दिँदा थप सहजहुने र चाँडै नै लक्षित वर्गले खोप पाउने भएकोले यसतर्फ ध्यानदिन पसिंघले सरकारसमक्ष अनुरोध गरेको छ ।
भेटमा उपप्रधान तथा अर्थमन्त्री पौडेलले सरकारले बजेट कार्यान्वयनलाई आफ्नो परीक्षको रूपमा लिएको उल्लेख गर्नुभयो । उहाँले बजेटमा आएका प्रतिक्रियाले आफू उत्साहीभएको र निजी क्षेत्रलाई साथमा लिएर कार्यान्वयन अघि बढाउने बताउनुभयो । उहाँले असारभर तयारीका काम सक्ने र साउन १ गतेबाट बजेट कार्यान्वयनमा लैजाने गरी कामगरिरहेको भन्दै त्यसमा सबैको साथआवश्यक रहेको पनि उल्लेख गर्नुभयो ।
मन्त्री पौडेलले कोरोनाको भ्याक्सिन खरिदमा सरकार अघि बढेको बताउनुभयो । उहाँले अमेरिका, चीन, भारत लगायतका देशबाट भ्याक्सिनखरिद गरी सबै नागरिकलाई उपलब्ध गराउन सरकार लागि परेको जानकारी गराउनु भयो ।
वि.सं.२०७८ असार ४ शुक्रवार ०८:३५ मा प्रकाशित