काठमाडौं । राधी विद्युत कम्पनीको सेयर मुल्यमा सकारात्मक सर्किट लागेको छ । मंगलबार कारोबार सुरु भएलगत्तै कम्पनीको सेयर मूल्य ९.९९ प्रतिशतले बढेको छ ।
यो समाचार तयार पार्दासम्म कम्पनीको सेयर मूल्य प्रतिकित्ता १०१ रुपैयाँले बढेर १११२ रुपैयाँ पुगेको छ । कम्पनीले मंगलबार नै आगामी साधारणसभाको पनि घोषणा गरेको छ । कम्पनीले असार २९ गते आर्थिक वर्ष २०७६-७७ को वार्षिक साधारणसभा गर्ने भएको छ ।
सोमबार बसेको कम्पनीको संचालक समितिको बैठकले उक्त दिन सभा गर्ने निर्णय गरेको हो । सभाले चुक्त पुँजीको ३६.५ प्रतिशत बोनस सेयर (कर बाहेक) जारी गर्ने विशेष प्रस्ताव पारित गर्ने जनाएको छ ।
बोनस सेयर जारी पश्चात कायम हुने चुक्त पुँजीको १४७.५२ प्रतिशत (१ः१.४७५२) कित्ता हकप्रद सेयर जारी गर्ने र जसका लागि आवश्यक कार्यका लागि संचालक समितिलाई अख्तियारी प्रत्यायोजना गर्ने प्रस्ताव लैजाँदै छ । कम्पनीले सभा र लाभांश प्रयोजनका लागि असार १५ गतेदेखि २९ गतेसम्म बुक क्लोज गर्ने भएको छ ।
वि.सं.२०७८ असार ८ मंगलवार ११:२२ मा प्रकाशित
