काठमाडौं । चालु आर्थिक वर्ष सकिन तीन दिन मात्रै बाँकी रहँदा जम्मा ७६.४९ प्रतिशत मात्रै बजेट खर्च भएको छ । कोरोना महामारीका कारण सरकारले अपेक्षा अनुसार बजेट खर्च गर्न नसकेको जनाएको छ ।
सरकारले चालु आर्थिक वर्षको अर्धवार्षिक समिक्षामार्फत बजेट खर्चको संशोधित अनुमान १४ खर्ब ७४ अर्ब ६४ करोड ५४ लाख रुपैयाँबाट घटाएर १३ खर्ब ४८ अर्ब ६८ करोड रुपैयाँ रहेको छ । १३ खर्ब ४८ अर्ब ६८ करोडमा असार २७ गतेसम्म ११ खर्ब २८ अर्ब २७ लाख रुपैयाँ खर्च भएको छ ।
असार २७ गतेसम्म चालु खर्च ८८.२५ र पुँजीगत खर्च ५५.८३ प्रतिशत मात्रै रहेको छ । आइतबारसम्म ८ खर्ब ३७ अर्ब ४७ करोड २८ लाख रुपैयाँ चालु खर्च भएको छ । यस्तै पुँजीगत खर्च ५५.८३ प्रतिशत अर्थात १ खर्ब ९७ अर्ब २ करोड ७८ लाख रुपैयाँ रहेको छ । यस्तै वित्तीय व्यवस्थापनतर्फ ५४.११ अर्थात ९३ अर्ब ५० करोड २१ लाख रुपैयाँ खर्च भएको छ ।
यो अवधिमा सरकारले ८ खर्ब ८५ अर्ब ८७ करोड १३ लाख अर्थात ८७.५६ प्रतिशत राजस्व संकलन गरेको छ । जसमा कर राजस्वतर्फ ८ खर्ब २२ अर्ब १ करोड ८० लाख अर्थात ९०.०४ प्रतिशत, गैरकर राजस्वतर्फ ६३ अर्ब ८५ करोड ३३ लाख रुपैयाँ अर्थात ६४.६२ प्रतिशत संकलन भएको छ ।
महालेखा नियन्त्रक कार्यालयमा असार २७ गतेसम्म १० अर्ब ७ करोड ५४ लाख अर्थात १६.६५ प्रतिशत अनुदान पाएको छ । सरकारले चालु आवमा १० खर्ब ११ अर्ब ७५ करोड ८४ लाख रुपैयाँ राजस्व संकलन गर्ने लक्ष्य राखेको थियो । तर सरकारले बजेटको अर्धवार्षिक समिक्षामा राजस्व संकलन लक्ष्य करिब ६ प्रतिशतले घटाएर ९ खर्ब ५९ अर्ब ६८ करोड रुपैयाँ राजस्व संकलन गर्ने लक्ष्य राखेको थियो । अबको चार दिनमा त्यो लक्ष्य पुरा हुने सम्भावना न्यून प्राय देखिएका छ ।
वि.सं.२०७८ असार २८ सोमवार १२:३७ मा प्रकाशित
