काठमाडौं । सरकारले आगामी चैत मसान्तसम्म सबै नागरिलाई खोप लगाउने प्रतिबद्धता जनाएको छ ।
नेपाली कांग्रेसका सभापति शेरबहादुर देउवाको नेतृत्वमा बनेको सरकारले गरेको पहिलो निर्णयमा उक्त कुरा उल्लेख गरिएको छ ।
प्रधानमन्त्रीमा नियुक्त भएपछि सिंहदरबारस्थित प्रधानमन्त्री तथा मन्त्रीपरिषद् कार्यालयमा बसेको मन्त्रीपरिषद्को पहिलो बैठकले सबै नागरिकलाई चैतसम्ममा खोप उपलब्ध गराउने निर्णय गरेको हो ।
स्रोतका अनुसार असोज मसान्तभित्र एक तिहाइ जनतालाई र आगामी चैत मसान्तसम्म सबै नागरिकलाई खोप लगाउने निर्णय भएको छ । त्यस्तै, कोभिड–१९ महामारी रोकथाम, नियन्त्रण र उपचारका लागि अघिल्लो सरकारले गरेको खर्च सार्वजनिक गर्ने निर्णय गरिएको छ ।
सरकारले गरेको अर्को निर्णणमा कोरोना महामारीको समयमा फ्रन्टलाइनमा खटेर काम गर्ने स्वास्थ्यकर्मी, सुरक्षाकर्मी र सफाइकर्मीले पाउनुपर्ने जोखिम भत्ता एक साताभित्र उपलब्ध गराउन शुरु गर्ने निर्णय बैठकले गरेको सरकारका प्रवक्ता एवं कानून न्याय तथा संसदीय मामिलामन्त्री ज्ञानेन्द्रबहादुर कार्कीले जानकारी दिनुभयो ।
वि.सं.२०७८ असार ३० बुधवार १०:०९ मा प्रकाशित
