काठमाडौं । नर्भिक इन्टरनेशनल हस्पिटलमा नयाँ नेतृत्व चयन भएको छ ।
अस्पतालको संचालक समितिको बैठकले अध्यक्षमा राजेन्द्रबहादुर सिंह र प्रमुख कार्यकारी अधिकृत(सीइओ)मा अजयकुमार मिश्रलाई नियुक्त गर्ने निर्णय गरेको हो । अध्यक्षमा नियुक्त सिंह यसअघि नर्भिक अस्पतालको कार्यकारी निर्देशकको रुपमा कार्यरत हुनुहुन्थ्यो । उहाँलाई बढुवा गरी संचालक समितिको अध्यक्ष बनाइएको हो ।
अध्यक्षमा नियुक्त सिंह विगत एकदशकभन्दा लामो समयदेखि नर्भिकमा आबद्ध हुनुहुन्छ । उहाँ नर्भिकमा आउनुअघि नेपाल प्रहरीको एआइजीबाट अवकाश हुनुभएको थियो । यसैगरी, नर्भिक अस्पतालको प्रमुख कार्यकारी अधिकृत(सीइओ)मा नियुक्त अजय मिश्र कुशल बैंकर हुनुहुन्छ । उहाँ विश्लेषक तथा बैंकहरुको मर्जर विज्ञ समेत हुनुहुन्छ ।
उनी यसअघि यूनाइटेड फाइनान्सको सीइओको रुपमा कार्यरत रहेका मिश्र यूनाइटेड फाइनान्सलाई नवील बैंकमा मर्ज गराएर एकीकृत कारोबारसँगै बैंकिङ क्षेत्रबाट अवकाशको घोषणा गर्नुभएको थियो । मिश्रसँग गोर्खा फाइनान्स, सिद्धार्थ डेभलपमेन्ट बैंक, जनता बैंक लगायतका आधा दर्जन बित्तीय संस्थामा काम गरेको अनुभव छ ।
बैंकिङमा आउनुअघि मिश्रले नेपाल सरकार, यूएनडिपी, प्लान इन्टरनेशनल, नेपाल टेलिभिजन लगायतमा काम गर्नुभएको थियो । मिश्रले काठमाडौ विश्वविद्यालयबाट विजिनेश एडमिनिस्ट्रेसनमा एमफिल(प्राचार्य)सम्मको अध्ययन पूरा गर्नुभएको छ । नर्भिक अस्पतालको नेतृत्व परिवर्तन भए पनि मुख्य लगानी भने बिएलसी होल्डिङ्सकै कायम रहनेछ ।
वि.सं.२०७८ असार ३१ बिहीवार १६:०४ मा प्रकाशित
