काठमाडौं । बैंक तथा वित्तीय संस्था परिसंघ नेपाल (सिविफिन)ले बैंकका सहायक कम्पनीलाई ब्रोकर लाईसेन्स दिने व्यवस्था गर्न अर्थमन्त्री जनार्दन शर्मालाई आग्रह गरेको छ । नवनियुक्त अर्थमन्त्री जनार्दन शर्मासँगको भेटमा यस्तो आग्रह गरेको हो ।
बैंकंहरुका शाखा कार्यालयमार्फत बैंकका सहायक कम्पनीहरुले ग्रामीण इलाका एवं दुरदराजमा समेत पुँजीबजार विस्तार गर्न सक्ने र वित्तीय पहुँच अभिवृद्धिमा योगदान गर्ने सक्ने प्रशस्तै संभावना रहेको सिविफिनको भनाई छ ।
बैंकका सहायक कम्पनीलाई ब्रोकर लाईसेन्स दिँदा लगानीकर्ताको लगानी सुरक्षित हुने, पुँजीबजारको विकास एवं विस्तार गर्न र वित्त बजारलाई अझ पारदर्शिरुपले संचालन गर्न सहयोग पुग्ने सिविफिनको भनाई छ । त्यसैले बैंकका सहायक कम्पनीहरुलाई ब्रोकर लाइसेन्स दिने व्यवस्था यथासंभव छिटो गर्न आग्रह गरेका छन् ।
भेटमा अध्यक्ष पवनकुमार गोल्यानले बैंक तथा वित्तीय संस्था ऐन, ०७३ को दफा ११ को ४ मा बैंक सञ्चालन भएको १० वर्ष पुगेपछि राष्ट्र बैंकको स्वीकृतिमा बैंकहरुले संस्थापक शेयर क्रमशः साधारण शेयरमा रुपान्तरण गर्न पाउने स्पष्ट व्यवस्था गरिएको स्मरण गराएको छ ।
यस्तो व्यवस्थालाई हालसम्म कार्यान्वयनमा नल्याइएको भन्दै संचालनमा आएको १० बर्षपछि बैंक तथा वित्तीय संस्थाले स्थायित्व प्राप्त गरिसक्ने हुँदा संस्थापक शेयर साधारण शेयरमा रुपान्तरण गर्न पाउने व्यवस्था युक्तिसंगत हुने जनाएको छ ।
अन्य देशहरुमा संस्थापक शेयर र साधारण शेयरको मूल्य समेत समान भएको सन्दर्भमा नेपालमा समेत सो व्यवस्था सान्दर्भिक हुने भएकाले उक्त व्यवस्थाको कार्यान्यवन गर्न आग्रह गरेको छ ।
वि.सं.२०७८ साउन ६ बुधवार १०:१५ मा प्रकाशित
