काठमाण्डौं । एक साताको अवधिमा सुनको भाउ प्रतितोला १६ सय रुपैयाँले घटेको छ। नेपाल सुनचाँदी व्यवसायी महासंघका अनुसार साताको पहिलो दिन आइतबार सुन प्रतितोला ५६ हजार रुपैयाँ रहेको थियो।
यो मूल्य शुक्रबारसम्म आउँदा ५४ हजार ४ सय रुपैयाँमा झरेको छ। सोमबार स्थिर रही मंगलबार सुन ५५ हजार ८ सयमा झरेको थियो। बुधबार ५५ हजार १ सय, बिहिबार ५५ हजार हुँदै शुक्रबार ५४ हजार ४ सय रुपैयाँमा सुनको कारोबार भयो।
त्यस्तै चाँदीको भाउ पनि घटेको छ। आइतबार ७ सय ७० रुपैयाँ रहेको चाँदीको भाउ शुक्रबारसम्म आउँदा ७ सय ५० रुपैयाँ कायम भएको छ।
सुध्रँदै गएको अमेरिकी अर्थतन्त्र र संघीय बैंकले ब्याजदर बढाउने अपेक्षा तथा बढ्दै गएको कच्चा तेलको मूल्यले गर्दा सुनको भाउलाई अन्तर्राष्ट्रिय बजारमा प्रभाव पारेको हो।
यदि अमेरिकी संघीय बैंकले आगामी वित्तीय अवधिमा ब्याजदर बढाएमा सुनको भाउ अझै घट्ने छ। यदि व्याजदर नबढेमा भने सुन पुनः उकालो लाग्ने विश्लेषण गरिएको छ।
प्रकाशितः २०७३ जेठ १५
वि.सं.२०७३ जेठ १५ शनिवार १२:०५ मा प्रकाशित
