काठमाण्डौं । के तपाईले सेयरमा लगानी गर्नुभएकोछ ? त्यसमा पनि के तपाईले तीन कम्पनीहरु माछापूछ्रे बैंक, नागबेली लघुवित्त या त सेवा विकास बैंकको सेयर किन्नुभएकोछ ? छ भने खुशी हुनुहोस् किनकी यी तीन कम्पनीले छिटै नै हकप्रद सेयर जारी गर्दैछन् ।
माछापुच्छ्रे बैंक लिमिटेडले आफ्ना सेयरधनीका लागि ५० प्रतिशत अर्थात दुई बराबर एकको अनुपातमा हकप्रद सेयर निष्काशन गर्ने भएको छ । बैंकले आगामी मंसिर १९ गतेदेखि पुस २४ गतेसम्मका लागि हकप्रद सेयर निष्काशन गर्न लागेको हो । बैंकले १०० रुपैयाँ अंकित दरको १ करोड ९३ लाख २२ हजार ७ सय कित्ता हकप्रद सेयर निष्काशन गर्नेछ । कम्पनीको सेयरको निष्काशन तथा बिक्री प्रबन्धकमा सिभिल क्यापिटल मार्केट लिमिटेड रहेको छ ।
त्यस्तै, नागवेली लघुवित्त विकास बैंक लिमिटेडले आफ्ना सेयरधनीलाई दुई बराबर १ अर्थात ५० प्रतिशत हकप्रद सेयर वितरण गर्ने भएको छ । बैंकले आगामी मंसिर २० गतेबाट हकप्रद सेयर जारी गर्न लागेको हो । बैंकले १०० रुपैयाँ अंकित दरका १ लाख २५ हजार कित्ता हकप्रद सेयर निष्काशन गर्ने भएकोछ । हकप्रद निष्काशन पुस २४ गतेसम्म खुला रहने बताइएको छ । बैैंकले आफ्नो सेयर निष्काशन तथा बिक्री प्रबन्धकमा एनएमबि क्यापिटल लिमिटेडलाई नियुक्त गरेकोछ ।
यसैगरी, सेवा विकास बैंक लिमिटेडले १२० प्रतिशत अर्थात १ बराबर १.२ को अनुपातमा हकप्रद सेयर वितरण गर्ने भएको छ । बैंकले १०० रुपैयाँ अंकित दरका ५१ लाख ६ हजार ६ सय ६२ कित्ता कित्ता हकप्रद सेयर निष्काशन गर्न लागेको हो । बैंकले आगामी मंसिर २३ गतेदेखि २७ गतेसम्म हकप्रद आवेदन दिन पाइने बताएकोछ । बैंकको सेयर निष्काशन तथा बिक्री प्रबन्धकमा एनएमबि क्यापिटल लिमिटेड रहेको छ ।
५ मंसिर २०७३, ११।००
वि.सं.२०७३ मंसिर ५ आइतवार ११:०९ मा प्रकाशित
