काठमाडौ । प्रभु इन्स्योरेन्स कम्पनीले सेयरधनीलाई १९.२० प्रतिशत बोनस सेयर र कर प्रयोजनको लागि १.०१ प्रतिशत नगद लाभाँश प्रदान गर्ने भएको छ । कम्पनीले बोनस सेयर पश्चातको चुक्ता पुँजीमा ४६ प्रतिशत हकप्रद सेयर दिने प्रस्ताव पनि साधारण सभामा लैजाँदैछ ।
यसका लागि कम्पनिले कार्तिक २१ गतेका लागि साधारण सभाको मिति तोकेको छ । हाल कम्पनीको चुक्ता पुँजी ५७ करोड ७५ लाख रुपैंया रहेको छ ।
साधारण सभाका लागि कम्पनिले कार्तिक ७ गते बुक क्लोज गर्दैछ । बोनस र हकप्रद प्रप्त गर्न कार्तिक ६ गते भित्रै सेयर किनिसक्नुपर्नेछ ।
यस्तै वोमी माईक्रोफाइनान्स वित्तीय संस्थाले सेयरधनीलाई २० प्रतिशत बोनस लगत्तै ३० प्रतिशत हकप्रद सेयर जारी गर्ने निर्णय गरेको छ । असोज ३१ गते बसेको सञ्चालक समितिको ९५ औँ बैठकले सो निर्णय गरेको हो ।
हालसम्मको चुक्ता पूँजी रु ६ करोड ४८ लाखको २० प्रतिशतले हुने बोनस सेयर रकम रु १ करोड २९ लाख ६० हजार वितरण गर्ने साधारण सभामा पेश गरिने भएको छ ।
माईक्रोफाइनान्सको कार्तिक ३० गते साधारण सभा गर्ने भएको छ । यसका लागि कम्पनिले कार्तिक १६ गते देखि ३० गते सम्म बुक क्लोजको निर्णय गरेको छ । सो आधारमा बोनस पाउनका लागि कार्तिक १५ गते भित्र सेयरधनीले सेयर किनिसक्नुपर्ने हुन्छ ।
सोही बैठकले चितवन जिल्ला भरतपूर महानगरपालिका वडा नं १२ मा यस बित्तीय संस्थाको प्रयोजनका लागि रु १ करोड ५ लाखमा जग्गा खरिद गर्ने निर्णय गरेको छ ।
यसैगरी स्वदेशी लघुवित्त वित्तीय संस्थाले १५ प्रतिशत बोनस सेयर वितरणपश्चात् १०० प्रतिशत हकप्रद निष्काशन गर्ने भएको छ । पछिल्लो सञ्चालक समिति बैठकले उक्त बोनस र बोनसपछि कायम हुने चुक्ता पुँजीबाट १ः१ अनुपातमा हकप्रद निष्काशन गर्ने निर्णय लिएको हो ।
हाल लघुवित्तको चुक्ता पुँजी १० करोड रुपैयाँ छ। १५ प्रतिशत बोनस सेयरपछि भने चुक्ता पुँजी ११ करोड ५० लाख रुपैयाँ हुनेछ । यो पुँजीबाट १०० प्रतिशत हकप्रद निष्काशनपछि स्वदेशीको चुक्ता पुँजी २३ करोड रुपैयाँ पुग्नेछ ।
त्यस्तै महुली सामुदायिक लघुवित्त वित्तीय संस्थाले सेयरधनीलाई ५० प्रतिशत बोनस सेयर र १० प्रतिशत नगद लाभांश दिने भएको छ । कम्पनीको असोज २१ गते शनिबार बसेको सञ्चालक समिति बैठकले हाल कायम चुक्ता पुँजी ४ करोड रुपैयाँबाट बोनस र नगद लाभांश दिने प्रस्ताव आगामी वार्षिक साधारण सभामा प्रस्तुत गर्ने निर्णय गरेको हो ।
यसैगरी, बोनस सेयर दिइसकेपछि कायम हुने ६ करोड रुपैयाँ चुक्ता पुँजीबाट ५० प्रतिशत अर्थात् २ः१ अनुपातमा हकप्रद जारी गरी चुक्ता पुँजी ९ करोड रुपैयाँ पुर्याउने प्रस्ताव पनि आगामी साधारण सभामा प्रस्तुत गरिने कम्पनीले जनाएको छ ।
प्रकाशित मितिः २०७४ कार्तिक ५
वि.सं.२०७४ कात्तिक ५ आइतवार १०:२० मा प्रकाशित
