काठमाण्डौं । युनाइटेड मोदी हाइड्रोपावरले सर्वसाधारणका लागि सेयर २८ लाख ७५ हजार कित्ता साधारण सेयर निष्कासन गर्ने भएकोछ । कम्पनीले सर्वसाधारणलाई लक्षित गरेर प्रतिकित्ता १०० रूपैयाँ अंकित दरका साधारण सेयर निष्कासन गर्न लागेको हो ।
कम्पनीले ११ लाख ५० हजार कित्ता सेयर आयोजना प्रभावित स्थानीय बासिन्दा र १७ लाख ७५ हजार कित्ता सेयर सर्वसाधारणलाई निष्कासन गर्ने भएको हो । कम्पनीले निष्कासन गर्न लागेको साधारण सेयरलाई नेपाल इक्राले आईपीओ ग्रेड ३ प्रदान गरेको छ । सेयर निष्कासनसँगै कम्पनीमा २५ प्रतिशत सर्वसाधारण र ७५ प्रतिशत संस्थापकको लगानी रहने छ ।
युनाइटेड मोदीले १० मेगावाट क्षमताका तल्लोमोदी १ जलविद्युत् आयोजना ०६९ मंसिरदेखि सञ्चालनमा ल्याएको छ । कम्पनीले १०.५ मेगावाटको तल्लोमोदी–२ निर्माण आगामी मंसिरदेखि सुरु गर्देछ । यो आयोजनाबाट आगामी ०७६ असारसम्म बिजुली उत्पादन गर्ने लक्ष्य कम्पनीले लिएको छ । दुवै आयोजना निर्माणपछि युनाइटेड मोदीको जडित क्षमता २०.५ मेगावाट हुनेछ ।
आयोजनाबाट उत्पादन हुने बिजुली नेपाल विद्युत् प्राधिकरणले खरिद गर्ने (पीपीए) सम्झौता भइसकेको छ । आयोजनामा सिटिजन्स बैंकको अगुवाइमा ऋण लगानी हुने भएको छ ।
९ असार २०७३, ११।००
वि.सं.२०७३ असार ९ बिहीवार १२:२९ मा प्रकाशित