धादिङ । चार किलोमिटर टाढाबाट पानी बोकेर जोहो गर्दै आएका स्थानीय बासी खानेपानी परियोजना सुरु भएपछि दंग परेका छन् । भारत सरकारको आर्थिक सहयोगमा निर्माण हुन लागेको चामभन्ज्याङ खानेपानी परियोजनाले खानेपानीका लागि टाढा जानुपर्ने असुविधा हट्ने र घरआँगनमा नै पानी पाउने आशा स्थानीयवासीले राखेका छन् ।
धादिङको पर्यटकीय क्षेत्रका रुपमा परिचित ज्यामरुङको नौवटा वडा मध्ये ८ नम्बर वडाको चामभन्ज्याङमा बन्न लागेको उक्त खानेपानी परियोजनाको लागत रु एक करोड ७८ लाख छ । करिब एक वर्षभित्र सम्पन्न गर्ने लक्ष्य राखिएको परियोजनाबाट १५९ घरधुरीले प्रत्यक्ष लाभ लिनेछन् ।
अविरल झरीका कारण सडक हिलाम्य बनेर सवारी आवतजावत ठप्प हुँदा समेत नेपालका लागि भारतीय राजदूत रणजित रायले एक घन्टाको उकालो पैदल हिँडेर सो परियोजना शिलान्यास गरेका थिए ।
१९ असार २०७३, १।००
वि.सं.२०७३ असार १९ आइतवार १४:३३ मा प्रकाशित