म्याग्दी । पशुपालक किसानलाई गत आवमा रु ५८ लाख तीन हजार अनुदान वितरण गरिएको छ ।
गत आवमा भेडाबाख्रा, गाईभैँसी, बङ्गुर र कुखुरापालक गरी ८९६ किसानलाई सो अनुदान रकम वितरण गरिएको कार्यालयका पशुसेवा प्राविधिक डिल्लीराम रेग्मीले जानकारी दिनुभयो । व्यावसायिक पशुपालन फार्ममा पूर्वाधार विस्तार, उपकरण खरिद, गोठसुधार, उन्नत जातका बोका, राँगो खरिद, औषधि उपचार कोष स्थापना, पशु आहरा व्यवस्थापन र पशुजन्य पदार्थको व्यवसाय सुधार गर्न किसानलाई अनुदान सहयोग गरिएको हो ।
बाख्रापालन कार्यक्रमअन्तर्गत पिप्ले, शिख र कुहुँका एकसय ५० किसानले बाख्रा खरिद र खोर सुधारका लागि रु १३ लाख ५० हजार अनुदान पाएका छन् । यस्तै १० गाविसका १५ बाख्रापालक किसानलाई प्रजननयोग्य बोका खरिद गर्न रु १५ हजारका दरले रु दुई लाख २५ हजार अनुदान दिइएको छ ।
यस्तै तीस जनालाई गोठ सुधार गर्न रु एक लाख ५० हजार र चारजनालाई घाँस टुक्रा पार्ने च्यापकटर मेसिन खरिद गर्न रु ५५ हजार, कालीगण्डकी भेडापालन किसान समितिका ५० जनालाई भेडा स्रोत विकास कार्यक्रमअन्तर्गत रु छ लाख पाँच हजार, एकसय ६५ जनालाई रु ३३ हजार मूल्य पर्ने उन काट्ने मेसिन र एकसय ५० जनालाई रु एक लाख मूल्य बराबरको बडिजो क्यासटेटर मेसिन वितरण गरेको पशु विकास अधिकृत नरबहादुर बानियाँले जानकारी दिनुभयो ।
प्रकाशितः २०७३ साउन १८
वि.सं.२०७३ साउन १८ मंगलवार १६:०१ मा प्रकाशित
