काठमाडौँ, २५ साउन । अनावश्यक हल्लाका कारण सेयर बजारमा ‘अस्वभाविक’ गिरावट आएको सरोकारवालाले बताएका छन् ।
मिडिया इन्टरनेसनलले मंगलबार आयोजना गरेको कार्यक्रमका वक्ताले सेयर बजारमा आएको गिरावटमा हल्लाबाहेकका अन्य कारण गौण रहेको बताएका हुन् ।
कार्यक्रममा सेयर विश्लेषक डा गोपाल भट्टले सेयर बजार अहिले वास्तविकतामा भन्दा हल्लाको भरमा चलिरहेको बताउँदै सेयर बजार अत्यन्त संवेदनशील हुनाले स–साना कुराले प्रभाव पारिरहेको उल्लेख गरे ।
ब्रोकर एसोसियसनका अध्यक्ष प्रियराज रेग्मीले सेयर बजारको गिरावटमा आफूहरुको कुनै भूमिका नरहेको स्पष्ट पार्दै अनावश्यक हल्लासँगै बजारको नियमन गर्ने नेपाल धितोपत्र बोर्डको कमजोरीका कारण बजार अस्वभाविक रुपले ओरालिएको टिप्पणी गरे । उनले भने, “हाम्रो कार्यक्षेत्र अलि विस्तार होस् भनेर मागिरहेको छौँ”, “हामीलाई दोष लगाएर मात्र समस्याको समाधान हुँदैन ।”
लगानीकर्ता फोरमका सदस्य राजन लम्सालले धितोपत्र बोर्ड नियमनकारी निकाय हो कि सल्लाहकार भनेर छुट्याउन मुस्किल परेको बताए । नवगठित लगानीकर्ता सङ्घका अध्यक्ष उत्तम अर्यालले बजारमा उतारचढाव आइरहने भए पनि सोमबारको गिरावट अस्वभाविक र सुनियोजित रहेको टिप्पणी गरे ।
लगानीकर्ता फोरमका कार्यकारी सदस्य एवम् मेगा बैंकका निर्देशक दीपेन्द्र अग्रवालले धितोपत्र बोर्डको भूमिका अस्पष्ट र पक्षपाति रहेको आरोप लगाए । अघिल्लो सातादेखि ओरालो लागेको सेयर बजारमा यो साताको सुरुबाटै गिरावट आएको थियो ।
वि.सं.२०७३ साउन २५ मंगलवार १९:२३ मा प्रकाशित
