काठमाण्डौं । नेपाल खाद्य संस्थान र चौपाया व्यवसायी संघ कलंकीले दसैंका लागि उपत्यकामा करिब ५० हजार खसीबोका/च्यांग्रा भित्र्याउने भएको छ । संस्थानले नेपालगन्जबाट १ सय ५०, दाङबाट २ सय, वीरगन्जबाट ५ सय ५० र बाँकी अन्य जिल्लाबाट खरिद गर्ने योजना बनाएको छ । मुस्ताङबाट कम्तीमा १५ सय च्यांग्रा खरिद गरिने संस्थानले जनाएको छ ।
संस्थानले बिक्री गर्ने खसीबोका व्यवसायीको भन्दा किलोमा १० देखि १५ रुपैयाँ सस्तोमा बिक्री गर्छ । संस्थानले खसीबोका खरिद गर्न जिल्ला प्रमुख अधिकारीको संयोजकत्वमा खरिद समिति गठन गरेको छ ।
चौपाया व्यवसायी संघले भने मुख्यतया आयातित खसिबोका बिक्री गर्छन् । भारतको लखनउ, कर्नाटकलगायत १० स्थानबाट आयात हुन्छ । मुस्ताङ र चीनबाट करिब १५ सय च्यांग्रा ल्याइने जनाएको छ ।
भन्सार विभागको तथ्यांकअनुसार गत आर्थिक वर्ष २०७२÷७३ मा २ अर्ब ६८ करोड ३४ लाख ३० हजार रुपैयाँ बराबरको ४ लाख ७९ हजार २ सय ९७ खसीबोका आयात भएको थियो । ती खसीबोका भारत र अस्ट्रेलियाबाट आयात भएको थियो ।
२१ भदौ २०७३, १०।३०
वि.सं.२०७३ भदौ २१ मंगलवार १२:१६ मा प्रकाशित
