धादिङ । उत्तरी धादिङको मार्पाक गाविस स्थित लपाङफेदीमा बस दुर्घटना हुँदा १८ जनाको मृत्यु भएको छ ।
जिल्ला सदरमुकाम धादिङबेसीबाट विकट गाउँ किन्ताङफेदी जाँदै गरेको बा ३ ख ३३१८ नम्बरको बंकर बस लपाङफेदीको जिरोकिलो भन्ने ठाउँको भीरबाट खसेको हो । स्थानीय उद्धारकर्ताहरुका अनुसार ८ जना घाइतेको उद्धार गरिएको छ ।
अझै केहि मानिसहरु दुर्घटनाग्रस्त बसभित्रै च्यापिएको अवस्थामा रहेको प्रत्यक्षदर्शीले बताएका छन् । घाईते ६ जनालाई हेलिकप्टरबाट उद्धार गरि अस्पतालतर्फ पठाईएको स्थानीय गीता थापामगरले जानकारी दिईन् ।
सदरमुकाम धादिङबेसीबाट ३१ जनाको यात्रुको चलानी लिएर गाउँ हिँडेको बसमा छतमा समेत टनाटन यात्रु हालेको हुनाले करिब ५० जनाले यात्रा गरेको हुनसक्ने स्थानीय गीता थापा मगरले जानकारी दिईन् ।
बस सडकबाट करिब ३ सय मिटर तल आखुँ खोलामा खसेको छ । बसको छत र सीटमा टनाटन यात्रु देखेको प्रत्यक्षदर्शी दुर्गा बहादुर कुमालले जानकारी दिए । पहिरोले थुनिएको बाटोलाई स्थानीयहरुले पन्छाएर बस पार गराउने क्रममा चिप्लिएर दुर्घटना भएको हो ।
घटनास्थलमा स्थानीयबासी, प्रहरी र पछिल्लो बसमा गएका यात्रुहरुले उद्धार गरिरहेका छन् । घटनास्थल सदरमुकाम धादिङबेसीदेखि ३२ किलोमिटर टाढा छ ।
घटनाको विस्तृत विवरण आउन बाँकी छ ।
प्रकाशित मिति ः २०७३ असोज ११
प्रकाशित मितिः २०७३ असोज ११
वि.सं.२०७३ असोज ११ मंगलवार १२:४५ मा प्रकाशित