काठमाण्डौं। चालु आर्थिक वर्षको चार महिनामा कृषि उद्योगमा २ अर्ब २२ करोड लगानी प्रतिबद्धता आएको छ । कुल ७ उद्योग मध्ये दुर्इ ठूला र पाँच साना उद्योगमा लगानी प्रतिबद्धता आएको उद्योग विभागले जनाएको छ।
विभागका अनुसार यो उद्योगबाट ३ सय ५० जनाले रोजगारी पाउनेछन्।विभागका अनुसार तीन साना उद्योगमा कोरिया, चीन र बंगलादेशका नागरिकको एक करोड ५० लाख रुपैयाँ लगानी रहने छ।
नेपालीले खरायो, भैसी, बाख्रा, माछापालन गर्ने योजनासहित विभागमा उद्योग दर्ता गरेका छन्। विभागमा दर्ता भएको सो उद्योगले व्यवसायिक तरकारी खेती गर्ने उल्लेख छ।यो अवधिमा दुर्इ सय उद्योग दर्ता भएका छन्।
यो मध्ये ७० पर्यटनसँग सम्वन्धित उद्योग छन्। दर्ता भएका मध्ये सेवाका ६८ र उत्पादनका ४४ उद्योग छन्। विभागका अनुसार उर्जाका ८ कम्पनी दर्ता भएका छन्।कुल उद्योग मध्ये १ सय ३९ वटा विदेशी लगानीका उद्योग छन्। विदेशी उद्योगले करिव चार हजारलाई रोजगारी दिने प्रतिवद्धता गरेको छ। दर्ता भएको ६१ स्वदेशी उद्योगले ४ हजार ६ सय रोजगारी दिने प्रतिवद्धता जनाएको छ।
विदेशी लगानीका उद्योगबाट ३ अर्ब ८६ करोड रुपैयाँको प्रतिवद्धता आएको छ। विभागका अनुसार स्वदेशी लगानीका ६९ अर्बको प्रतिबद्धता आएको छ। स्वदेशी लगानीमा जलविद्युतबाट ५० अर्ब ७६ करोड लगानी प्रतिबद्धता समेत छ।
१५ मंसिर २०७३, ११।००
वि.सं.२०७३ मंसिर १५ बुधवार ११:३१ मा प्रकाशित