अमेरिका । अमेरिकी अदालतले फेसबुकलार्इ अनधिकृत रुपमा अर्को कम्पनीको ‘भर्चुअल रियालिटी टेक्नोलोजी’ चोरी गरेको भन्दै दोषी ठहर गरेको छ । अदालतले फेसबुक लगायत घटनासँग सम्बन्धित फर्म ओकुलुसलार्इ ५० करोड डलर (५० अर्वभन्दा बढी रुपैयाँ) क्षतिपूर्ति तिर्न समेत आदेश दिएको छ । फेसबुकले सन् २०१४ मा ओकुलुसलार्इ किनेको थियो ।
ओकुलुसले हेड-सेट बनाउने क्रममा भिडियो गेम डेभलपर ‘जेनिम्याक्स’को कम्प्यूटर कोड प्रयोग गरेको बताइएको छ । आफ्नो ‘ट्रेड सिक्रेट’ अनधिकृत रुपमा चोरी गरेको आरोप लगाउँदै जेनिम्याक्स अदालत गएको थियो । ओकुलुसका सह-संस्थापक पहिले जेनिम्याक्सको कर्मचारी रहेको र उनैले जेनिम्याक्सको टेक्नोलोजी चोरी गरेको बताइएको छ ।
तल्लो अदालतले यस मुद्दामा ओकुलुसको बिपक्षमा फैसला गरेको छ । यसबापत ओकुलुसको स्वामित्व लिइसकेको फेसबुकले जेनिम्याक्सलार्इ क्षतिपूर्ति तिर्नुपर्ने भएको हो । ओकुलुसले यस घटनालार्इ निराशाजनक भनेको छ । उसले तल्लो अदालतको फैसलाको बिरुद्धमा अपिल गर्ने समेत जनाएको छ ।
बजारमा हाल बलियो रुपमा उभिएको फेसबुकलार्इ भने यो घटनाले त्रसित बनाइदिएको छ । फेसबुकले सन् २०१६ को चौथो त्रैमासिकमा खुद नाफा दोब्बरभन्दा बढी कमाएर बजारमा दर्हो उपस्थिती देखाएको थियो ।
यसले चौथो त्रैमासिकमा मात्रै ३ अर्ब ६० करोड डलर खुद नाफा कमाएको थियो । अदालतको आदेशले फेसबुकको साख गिर्ने भएकाले फेसबुक हतास देखिएको छ ।
फेसबुकका मालिक मार्क जुकरबर्गले ओकुलुसले अरु कसैको बौद्धिक सम्पति चोरी गरेको हो भने त्यो गलत भएको प्रतिक्रिया दिएका छन् । भर्चुअल रियालिटी सेक्टर फेसबुकको हालको बिजनेसहरुमध्ये निकै सानो हिस्सामात्र हो । तर भर्चुअल रियालिटीमा फेसबुकको उपस्थिती आगामी दश वर्षसम्मको लागि निकै महत्वपूर्ण हुने बताइएको छ ।
२० माघ २०७३, एजेन्सी/बिजमाण्डु, १.००
वि.सं.२०७३ माघ २० बिहीवार १३:३० मा प्रकाशित