काठमाण्डौं । नेपाल लाइफ इन्स्योरेन्सले गत आर्थिक बर्षको मुनाफाबाट आफ्ना सेयरधनीलाई कर सहित ३०.०८ प्रतिशत बोनस सेयर वितरण गर्ने प्रस्ताव गरेको छ । तर, गत महिना कम्पनीले जारी गरेको एफपीओलाई समेत बोनस प्रदान गरिने हुँदा यो अनुपात घट्ने कम्पनीले जनाएको छ ।
नेपाल लाइफले गतबर्षको कमाईबाट ६१ करोड ९२ लाख ८५ हजार ७२५ रुपैयाँ बराबरको बोनस सेयर तथा कर प्रयोजनका लागि ३ करोड २५ लाख ९३ हजार ९८६ रुपैयाँ कर प्रयोजनका लागि नगद लाभांस वितरण गर्ने जनाएको छ ।
कम्पनीले प्रस्ताव गरेको लाभांस केही समय अगाडी बिक्री गरेको थप नयाँ साधारण सेयर अर्थात एफपीओलाई पनि प्रदान गर्नेछ । एफपीओलाई बोनस दिदा बोनस अनुपात घटेर २६.३१ प्रतिशत कायम हुने कम्पनीले जनाएको छ ।
नेपाल लाइफले चार अर्ब ४१ करोड रुपैयाँ बराबरको ३० लाख ९६ हजार ४९९ कित्ता एफपिओ जारी गरेको थियो । पुस २७ गते बाट आवेदन खुलेको कम्पनीको एफपीओमा दुई लाख ४८ हजार ५० आवेदकबाट कूल ५१ अर्ब ८८ करोड रुपैयाँ बराबरको आवेदन परेको थियो ।
कम्पनीले प्रस्ताव गरेको लाभांस बिमा समितको स्वीकृति पश्चात आगामी साधारणसभाबाट पारित भएपछि मात्रै लगानीकर्तालाई वितरण हुनेछ ।
२७ माघ २०७३, ११।००
वि.सं.२०७३ माघ २७ बिहीवार ११:४९ मा प्रकाशित
