एजेन्सी–कोरियाली अदालतको आदेशपछि दक्षिण कोरियाका अपदस्थ राष्ट्रपति पार्क गुएन हायलाई प्रहरीले पक्राउ गरेको छ । ६५ वर्षीया पार्कलाई पक्राउपछि प्रहरीले राजधानी सिओलको दक्षिणी भागमा रहेको एउटा कारागारमा राखेको छ ।
कोरियाली समाचार संस्थाहरुका अनुसार पदमा रहँदा उनले विभिन्न कम्पनीबाट ठूलो मात्रामा रकम भ्रष्टाचार गरी आफ्ना सहयोगी चाई सून सीललाई सहयोग गरेको अभियोगको छानविन गर्न अदालतले पक्राउ गर्न आदेश दिएको हो । उनलाई पक्राउ नगर्दा प्रमाणहरु नष्ट हुने सम्भावना रहेको भन्दै उनलाई पक्राउ गरिएको हो ।
पक्राउपछि उनलाई नजरबन्दमा राख्ने तयारी भइरहेको समाचार संस्थाहरुले जनाएका छन् । यसअघि उनलाई महाअभियोग लगाएर राष्ट्रपतिबाट बर्खास्त गरिएको थियो । दक्षिण कोरियाकी पहिलो महिला राष्ट्रपति रहे पनि अपराधमा तानिएर हिरासतमा पर्नेमा उनी तेस्रो पूर्वराष्ट्रपति बनेकी छन् ।
प्रकाशित मितिः २०७३ चैत १८
वि.सं.२०७३ चैत १८ शुक्रवार ११:५६ मा प्रकाशित
