काठमाडौं । आइतवार सार्वजनिक विदा दिएको छ । आइतवार अर्थात माघ २६ गतेका दिन झापाका तीनवटा स्थानीय तहले सार्वजनिक बिदा दिएका हुन ।
महाभारतकालीन किम्बदन्तीसँग जोडिएको झापाको भद्रपुरमा मनाइने किचकबध धार्मिक मेलाको अवसरमा भद्रपुर नगरपालिका, कचनकवल र हल्दिबारी गाउँपालिकाले आइतबार सार्वजनिक बिदा दिएका हुन्।
पालिकाहरूले छुट्टाछुट्टै सूचना जारी गरी बिदा दिएको हो । सो दिन स्थानीय तहअन्तगर्तका सम्पूर्ण सरकारी कामकाज बन्द रहनेछ ।
प्रत्येक वर्ष माघे शुल्क पूर्णिमा अर्थात् स्वस्थानी व्रतका दिन धार्मिक परम्परा अनुसार भद्रपुर २ र ३ नम्बर वडामा रहेको किचकबधमा मेला लाग्ने गरेको छ ।
यसबर्ष माघ २६ गते आइतबार मेला लाग्ने भएको छ । किचकवधमा रहेको ऐतिहासिक धार्मिक पोखरीमा माघे शुल्क पूर्णिमा दिन स्वतफुर्त पानी आउने गरेकोले सो पोखरीमा नुहाउँदा व्रतालु भक्तजनहरूले इच्छाएको मनकामना पूरा हुने गरेको धार्मिक विश्वास छ ।
महाभारत कालीन किम्बदन्तीअनुसार विराट राजाका सालो किचक सेनापति थिए । पाँच पाण्डवकी रानी द्रौपदीको यौवन र रूप माथि कुदृष्टि राख्ने सेनापति किचकलाई भीमसेनले मुड्क्याएर मारेको किम्बदन्ती छ ।
सोही कथावस्तुलाई आधार मानेर यस ठाउँका नाम किचकबध नामकरण गरिएको किचकबध ऐतिहासिक, धार्मिक तथा पर्यटकीय स्थल संरक्षण समितिका सचिव मदन कँडेलले जानकारी दिए।
वि.सं.२०७६ माघ २४ शुक्रवार ०५:३० मा प्रकाशित
