कपिलवस्तु । कपिलवस्तु अस्पतालको आइसोलेसन वार्डमा रहेका एक बिरामीको सोमबार राती मृत्यु भएको छ । मृत्यु हुनेमा विजयनगर गाउँपालिका वडा नं. २ का ३० वर्षीय गोवर्धन भर रहेको अस्पतालले जनाएको छ ।
मृतक भरलाई कोरोना भाइरसको लक्षण देखिएपछि ३ दिनदेखि आइसोलेसन वार्डमा राखी उपचार गरिँदै आएको थियो । मृतक भर क्षयरोगको बिरामी समेत थिए ।
क्षयरोगको लामो बिरामी, निमोनिया र फोक्सोमा समस्याका कारण उनको मृत्यु भएको अस्पतालले जनाएको छ । उनको स्वाब परीक्षणका लागि पठाइएको रिर्पोटमा कोरोना भाइरस नेगेटिभ रहेको अस्पतालको मेडिकल सुपरिटेण्डेन्ट डा. किशोर बन्जाडेले बताए ।
मृतक भरले विगत ३/४ वर्षदेखि क्षय रोगको औषधि सेवन गर्दै आएका थिए । पटकपटक बिरामी हुने गरेका भरलाई पछिल्लो पटक अधिक ज्वरो आएपछि बहादुरगंज स्थित शिवराज अस्पतालमा उपचार गरी थप उचारका लागि चन्द्रौटा स्थित निजी स्वास्थ्य संस्थामा लगिएको थियो ।
चन्द्रौटामा भरलाई अधिक ज्वरोसहित कोरोना भाइरस संक्रमणको लक्षण देखिएपछि कपिलवस्तु अस्पतालको आइसोलेसन वार्डमा राखी उपचार थालिएको थियो । आइसोलेसन वार्डमा उपचारकै क्रममा उनको मृत्यु भयो ।
मृतक भरको परिवारको आर्थिक अवस्था निकै कमजोर छ । परिवारमा काजक्रिया गर्ने सम्मको पैसा नभएको मृतक भरकी पत्नी चम्पा भरले बताइन् ।
मृतक भरको शवलाई घरसम्म र्पुयाउनका लागि एम्बुलेन्स वा शव वाहनको भाडासम्म तिर्ने पैसा नभएपछि आफन्तजनले गाउँकै एक टेम्पु खोजेर शव घरसम्म र्पुयाएका छन् ।
आफूसँग भएको ४/५ हजार रुपैयाँ श्रीमान्को औषधी उपचारमै सकियो, मृतक भरकी पत्नी चम्पाले भनिन्, ’पतिको मृत्यु भइहाल्यो अब काज क्रिया कसरी गर्ने ? परिवार कसरी पाल्ने ? त्यो मेरो लागि ठूलो समस्या भयो ।’
वि.सं.२०७६ चैत २५ मंगलवार १८:२२ मा प्रकाशित
