नयाँ दिल्ली । भारतमा जारी लकडाउनबीच सोमबारदेखि मदिरा पसलहरु खुल्ने भएका छन् । कोरोना भाइरसको जोखिम नरहेका दिल्लीका क्षेत्रहरुमा ४ सय ५० वटा मदिरा पसल खुल्ने भारतीय समाचार संस्था पीटिआईले जनाएको छ।
दिल्लीका सबै ११ जिल्ला कोरोना भाइरसको ‘रेड’ जोनमा छन्। खुल्न लागेका मदिरा पसलहरु कुनैपनि मलहरुका छैनन्। दिल्लीमा पाँच सय ४५ वटा मदिरा पसल छन्। दिल्ली सरकारले केन्द्रीय सरकारको अनुमतिपछि खुल्न दिन मिल्ने मदिरा पसलको सूची तयार गरेको हो
भारतको केन्द्रीय सरकारले केही दिनअघि मे १८ तारिकसम्म देशब्यापी लकडाउन लम्ब्याउने निर्णय गरेको थियो। पीटिआईका अनुसार दिल्लीमा ‘ग्रिन’ र ‘ओरेन्ज’ क्षेत्रसँगै रेड जोनका हटस्पटबाहेकका क्षेत्रमा मदिरा पसल र सुर्तिजन्य सामग्रीका पसलहरु खुल्न दिइन लागिएको छ।
दिल्लीमा हालसम्म चार हजार १ सय २२ जना कोरोना संक्रमित छन्। शनिबार मात्र ३ सय ८४ जना नयाँ संक्रमित भेटिएका थिए। दिल्लीमा हालसम्म ६४ जनाको ज्यान गएको छ। शनिबार मात्र ३ जनाले ज्यान गुमाएका थिए। -एजेन्सी
वि.सं.२०७७ वैशाख २१ आइतवार १५:५३ मा प्रकाशित
