काठमाडौं । कोरोना संक्रमणबाट मृत्यु भएका राजविराज नगरपालिका–६ का ७३ वर्षीय एक पुरुषको परिवारका सबै सदस्यमा कोरोना संक्रमण पुष्टि भएको छ।
गजेन्द्रनारायण सिंह सगरमाथा अस्पतालमा गरिएको स्वाब परीक्षणमा उनको परिवारका ५ जना सदस्यलाई कोरोना भाइरस पुष्टि भएको जिल्ला स्वास्थ्य कार्यालय राजविराजका प्रमुख दुुनीयालाल यादवले जानकारी दिए। उनका अनुसार मृतक परिवारका पाँचै जनालाई कोरोना पोजेटिभ भएपछि उनको घरलाई नै आइसोलेसन सेन्टर बनाइएको छ।
घरको एउटा भागलाई सेनिटाइज गरेर लक गरिएको छ, भने अर्को भागमा पाँचै जना सदस्य बसेका छन। उनको घर नजीकै राजविराजको अस्थायी कोरोना अस्पताल रहेको छ। ‘कोरोना संक्रमित व्यक्तिलाई अपनाउनुपर्ने सावधानी, सरसफाई, सुरक्षालगायतका विषय जानकारी गराएका छौं,’ डाक्टर यादवले भने, ‘घरमै भएपनि उनीहरू स्वास्थ्यकर्मीको निगरानीमा छन्। घरमा केही सामग्रीको आवश्यकता परेमा सुरक्षाकर्मीमार्फत व्यवस्था गरिन्छ।’
स्वासप्रश्वासमा समस्या भएपछि गत असार ३० गते उपचारका लागि वीपी कोइराला स्वास्थ्य विज्ञान प्रतिष्ठान धरानमा भर्ना गरिएका ७३ वर्षीय वृद्धाको स्वाब परीक्षण गर्दा कोरोना पोजेटिभ पुष्टि भएको थियो। उनको गत शुक्रबार उपचारका क्रममा मृत्यु भएको थियो। मृत्युपछि उनका परिवारका सदस्य सहित २३ जना स्थानीयको स्वाब संकलन गरेर राजविराजस्थित गजेन्द्रनारायण सिंह सगरमाथा अस्पतालको प्रयोगशालामा परीक्षण गर्दा परिवारका सबैमा कोरोना संक्रमण पुष्टि भएको थियो।
मृतकको पसल समेत रहेकाले त्यहाँ काम गर्ने र आवतजावत गर्ने १७ जनाको पनि परीक्षण गरिएको छ। तीमध्ये एकजनाको नतिजा नेगेटिभ आएको र बाँकीको भने नतिजा आउन बाँकी रहेको जिल्ला स्वास्थ्य कार्यालयका प्रमुख यादवले जनाएको आजको नागरिक दैनिकमा खवर छ ।
वि.सं.२०७७ साउन ५ सोमवार ०९:१० मा प्रकाशित
