हेटौँडा । अख्तियार दुरुपयोग अनुसन्धान आयोग क्षेत्रीय कार्यालय हेटौँडाले रू. ८० हजार घूस लिएको अभियोगमा एक कर्मचारीलाई पक्राउ गरेको छ ।
सिंचाइ विकास डिभिजन कार्यालय कलैया बाराका सब-इञ्जिनीयर गजेन्द्रप्रसाद जैसवाललाई घूस लिएको अभियोगमा पक्राउ गरिएको आयोग क्षेत्रीय कार्यालय हेटौँडाले जानकारी दिएको छ ।
सब इञ्जिनीयर जैसवाललाई वडा नं ४ कलैया बजारमा सेवाग्राहीसँग घूस लिएको अभियोगमा पक्राउ गरिएको हो । नदीको तटबन्ध जाली लगाउने काम सम्पन्न भएपछि रकम भुक्तानी गरिदिएवापत सेवाग्राहीसँग अवैध रकम मागेको भन्ने विशेष उजुरीका आधारमा आयोगको टोलीले उनलाई पक्राउ गरेको बुझिएको छ ।
आयोगको टोलीले घुस लिएको देखेपछि सबइञ्जीनियर जैसवालले आफ्नो नजीक रहेका चन्दन जैसवाललाई रकम दिई भाग्न खोजेको अभियोग लगाइएको छ । दुवैलाई पक्राउ गरी हेटौँडा ल्याइएको छ । अनुसन्धानपछि काठमाडौं पठाइने आयोग क्षेत्रीय कार्यालय हेटौँडाले जानकारी दिएको छ । रासस
वि.सं.२०७७ साउन ८ बिहीवार १६:३१ मा प्रकाशित
