काठमाडौं । प्रधानमन्त्री एवं सत्तारुढ दल नेपाल कम्युनिष्ट पार्टी (नेकपा) का अध्यक्ष केपी शर्मा ओलीले मन्त्रिमण्डल पुनर्गठन आवश्यकता अनुसार गर्ने बताउनुभएकोछ । शनिबार साँझ एक निजी टेलिभिजनलाई अन्तर्वार्ता दिँदै प्रधानमन्त्री ओलीले त्यस्तो बताउनुभएको हो ।
मन्त्रिमण्डल पुनर्गठनबारे आफूले विचार गरिरहेको उहाँले बताउनुभयो । त्यसको अधिकार प्रधानमन्त्रीमा हुने भएकाले सोही अनुसार समीक्षा गरेर निष्कर्षमा पुग्ने उहाँको भनाइ छ ।
प्रधानमन्त्री ओलीले उक्त अन्तवार्तामा भन्नुभएको छ–‘मन्त्रिमण्डलको गठन, पुनर्गठन आवश्यकताले गर्ने हो । त्यो म विचार गर्दैछु । मुख्य कुरा यो प्रधानमन्त्रीले विचार गर्ने कुरा हो । पुरानै साथीहरुको टिम लिएर अगाडि बढ्ने हो । त्यसमा आंशिक हेरफेर गर्नुपर्छ वा पूर्ण हेरफेर गरेर नयाँ टिमका साथ अगाडि बढ्दा बढी गतिशिलताका साथ अगाडि जान सकिन्छ भनेर प्रधानमन्त्रीले विचार गर्ने कुरा हो । म त्यसमा विचार गर्दैछु ।’ तर, प्रदेशका मुख्यमन्त्री भने फेरबदल नहुनेउ उहाँको दाबी छ । तत्काल मुख्यमन्त्री परिवर्तन गर्नु भनेको अस्थिरता निम्त्याउनु भएको ओलीको तर्क छ । साथै, ओलीले पार्टीभित्र केही समस्या रहे पनि पार्टी नफुट्ने समेत स्पष्ट पार्नुभएको छ ।
वि.सं.२०७७ भदौ १४ आइतवार १६:२४ मा प्रकाशित
