गोरखा । गोरखा नगरपालिकामा जारी निशेषधाज्ञा भदौ ३१ गतेसम्म थपिएको छ । शुक्रबार बसेको कोभिड–१९ संकट व्यवस्थापन केन्द्रको बैठकले भदौ ३१ गते राति १२ बजेसम्म लागू हुने गरी निषेधाज्ञा थप गरिएको जिल्ला प्रशासन कार्यालय गोरखाका अधिकृत हर्क रोकाले बताए ।
गोरखा नगरपालिकामा कोरोना संक्रमित बढ्दै गएपछि भदौ २० गतेबाट आज(शुक्रबार) राति १२ बजेसम्म निषेधाज्ञा जारी गरिएको थियो । कोरोना संक्रमितको संख्या पनि थप भएको तथा कन्ट्रयाक्ट ट्रेसिङको रिपोर्ट आउन बाँकी रहेकाले तत्कालका लागि निषेधाज्ञा कायम राख्ने निर्णय भएको रोकाले बताए ।
जोखिम न्यूनिकरणका लागि नगर क्षेत्रमा निषेधाज्ञा जारी गरी कन्ट्याक्ट ट्रेसिङलाई तीव्र पारिएको उनले बताए । निशेषधाज्ञाको अवधिमा अत्यावश्यक बाहेक अन्य सवै सेवा, यातायात, व्यपार, व्यवसाय बन्द हुनेछन् ।
सरकारी कार्यालय, स्थानीय तह, सार्वजनिक संस्थान, सामाजिक सेवाका संघ संस्थाहरु बैंक तथा वित्तिय संस्था पूर्ण रुपमा बन्द गर्न निर्देशन गरिएको छ ।
अत्यावश्यक कामबाहेक हिँडडुल नगर्न सर्वसाधरणलाई नगरपालिकाले अनुरोध गरेको छ । निषेधाज्ञा प्रभावकारी बनाउन प्रहरी परिचालन गरिएको छ ।
वि.सं.२०७७ भदौ २६ शुक्रवार १८:११ मा प्रकाशित
