काठमाडौं । नेपाल विद्युत प्राधिकरणका कार्यकारी निर्देशक कुलमान घिसिङ प्राधिकरणबाट औपचारिक रुपमा बिदा हुनुभएको छ ।
प्राधिकरणका कर्मचारीले आज औपचारिक रुपमा घिसिङलाई बिदाइ गरेका हुन् । घिसिङको चार वर्षे कार्यकाल आइतवार सकिएपछि कर्मचारीहरुले आज बिदाइ गरेका हुन् ।
कार्यक्रममा आधिकारिक ट्रेड युनियन नेपाल विद्युत प्राधिकरण कर्मचारी युनियनका अध्यक्ष रामेश्वर पौडेलले कुलमान घिसिङको कार्यकालमा प्राधिकरणको कायापलट हुने गरी विकास भएको धारणा राख्नुभएको थियो ।
उहाँले धेरै नाफा हुने संस्थानको रुपमा प्राधिकरणको विकास गर्न सफल घिसिङलाई सरकारले पुनः नियुक्ति गर्नुपर्ने बताउनुभयो । पहिलो कार्यकालका रुपमा बिदाइ गरिए पनि घिसिङलाई अबको १५ दिनभित्र फेरि स्वागत गर्न पाउनेमा आफूहरु आशावादी रहेको उहाँले बताउनुभयो । त्यस क्रममा प्राधिकरणका उपकार्यकारी निर्देशक हितेन्द्रदेव शाक्यले घिसिङलाई बुद्धको मूर्ति उपहारस्वरुप दिनुभएको थियो ।
प्राधिकरणको कार्यकारी निर्देशकको रुपमा कुलमानको आइतबार ४ वर्षे कार्यकाल सकिएको थियो । तर सरकारले आझै नयाँ कार्यकारी निर्देशकको नियुक्ति गरिसकेको छैन । कुलमानलाई नै पुनः नियुक्त गर्नुपर्ने आवाज उठिरहे पनि सरकारले यसबारेमा कुनै निर्णय गरिसकेको छैन ।
वि.सं.२०७७ भदौ ३० मंगलवार १६:४२ मा प्रकाशित
