जापान । कोरोना भाइरस महामारीले अर्थतन्त्रमा पारेको प्रभाव स्वरुप जापानमा जग्गाको भाउ घटेको छ । जापानमा जग्गाको भाउ घटेको यो ३ वर्षमा पहिलो पटक हो ।
कोरोना भाइरसको महामारीबीच होटल र पसल जस्ता व्यवसाय सञ्चालनका लागि जग्गाको माग घटेसँगै मूल्य पनि प्रभावित भएको हो ।भूमि, पूर्वाधार, यातायात तथा पयर्टन मन्त्रालयले सार्वजनिक गरेको तथ्यांकले यस्तो देखाएको हो ।
तथ्यांकअनुसार गत वर्षको तुलनामा यस वर्ष जग्गाको भाउ औसत शून्य दशमलव ६ प्रतिशतले घटेको हो । देशभरबाट सर्वेक्षणमा सहभागी गराइएका २१ हजार ५ सय १९ साइटमध्ये जुलाई १ सम्ममा ६० दशमलव १ प्रतिशतको मूल्य घटेको छ ।
कुल साइटमध्ये २१ दशमलव ४ प्रतिशतमा गत वर्षको सोही अवधिको तुलनामा मूल्य बढेको भए पनि यो वृद्धिले महामारी अघिको बजारको अवस्था देखाएको मन्त्रालयको भनाइ छ ।
सर्वेक्षणमा सहभागी मध्ये १८ दशमलव ५ प्रतिशत साइटको मूल्य घटेको छ । सर्वेक्षणमा देशभरबाट व्यवसायिक, आवासीय र औद्योगिक सबै खालका जग्गाको औसत मूल्य समावेश गरिएको थियो ।
विदेशी पयर्टकको आगमन, व्यवसायिक सम्पत्तिको भाडामा भएको वृद्धि र पयर्टन क्षेत्रमा लगानीका कारण सन् २०१८ मा जापानमा सम्पत्तिको मूल्य २७ वर्षमा पहिलो पटक बढेको थियो ।
समीक्षा अवधिमा व्यवसायिक प्रयोजनका जग्गाको भाउ शून्य दशमलव ३ प्रतिशतले घटेको छ । यो कमी पाँच वर्ष यताकै पहिलो हो । त्यस्तैगरी आवासीय जग्गाको भाउमा भने शून्य दशमलव ७ प्रतिशतको कमी आएको थियो ।
वि.सं.२०७७ असोज १५ बिहीवार १८:२४ मा प्रकाशित