काठमाडौं । जलविद्युत सम्बन्धी व्यवसाय गरिरहेको अपि पावरले हकप्रद शेयर जारी गर्ने भएको छ । कम्पनीले आगामी कात्तिक १४ देखि मंसिर ४ गतेसम्म हकप्रद शेयर जारी गर्ने भएको हो ।
कम्पनीले नेपाल धितोपत्र बोर्डबाट असोज १८ गते हकप्रदका लागि स्वीकृत प्राप्त गरेको छ । गत फागुन ३० गतेसम्म कायम साविक शेयरधनीहरुका लागि १ शेयर बराबर नयाँ ०.४७६१९०४७६१९ को अनुपातमा प्रति शेयर एक सय अंकित दरको ५६ लाख ७० हजार कित्ता हकप्रद साधारण शेयर निश्कासन गर्ने भएको हो ।
कम्पनीको हालको अधिकृत पुँजी ५ अर्ब, जारी पुँजी ४ अर्ब र चुक्ता पुँजी १ अर्ब १९ करोड छ । गत आर्थिक वर्षसम्म कम्पनीको नेटवर्थ १३६ करोड रहेको छ । जगेडा कोष तथा संचित नाफामा १७ करोड तथा प्रतिशेयर आम्दानी ८ रुपैयाँ ०४ पैसा छ।
कम्पनीले ४० मेगावाट क्षमताको तेस्रो जलविद्युत आयोजना माथिल्लो चमेलिया निर्माणमा लगानी गर्नका लागि शेयरधनीहरुबाट पुँजी जुटाउन हकप्रद शेयर जारी गर्ने भएको हो।
वि.सं.२०७७ असोज २३ शुक्रवार १४:१६ मा प्रकाशित
