काठमाडौं । सेयर बजारमा विभिन्न १७ कम्पनीको ६ अर्ब २१ करोड १७ लाख ९७ हजार ७२० रुपैयाँको ६ करोड २० लाख ३६ हजार ४३६ कित्ता आईपीओ धितोपत्र बोर्डको पाइप लाइनमा रहेको छ ।
धितोपत्र बोर्डको पाइप लाइनमा रहेको कम्पनीहरुमा अधिकांश जलविद्युत कम्पनी नै रहेका छन् । एउटा इन्स्योरेन्स कम्पनी र एउटा माइक्रोफाइनान्स कम्पनी समेत बोर्डको पाइपलाइनमा रहेका छन् ।
पछिल्लो समयमा सेयर बजारमा आएको देखिएको बुलिस टे«न्डसँगै कम्पनीहरुको आईपीओमा लगानीकर्ताहरुले माग भन्दा बढी नै आवेदन दिने गरका छन् । कुनै समयमा जलविद्युत कम्पनीको आईपीओमा आयोजना प्रभावित मात्रै नभएर सर्वसाधारणले पनि माग अनुसार आवेदन दिने क्रम ज्यादै न्यून रहेको थियो । तर पछिल्लो समयमा अन्य कम्पनीजस्तै जलविद्युत कम्पनीको आईपीओमा पनि माग भन्दा बढी नै आवेदन पर्ने गरेको छ ।
पछिल्लो समयमा आएको बिक्री खुला भएको ग्रिन लाइफहाईड्रोपावरको आईपीओमा पनि माग भन्दा झण्डै ७ गुढा बढी आवेदन परेको छ । यसले पनि लगानीकर्ताहरुको ध्यान आईपीओमा कति रहेछ भनेर सहजै थाहा पाउन सहजै बनाएको छ । अहिले बोर्डको पाइपलाइनमा रहेका कम्पनीमा ११ वटा जलविद्युत कम्पनी मात्रै रहेका छन् ।
बोर्डको पाइपलाइनमा रहेका कम्पनीमा सबै भन्दा बढी मध्ये भोटेकोशी जलविद्युत कम्पनीको १ अर्ब ५० करोड रुपैयाँको १ करोड ५० लाख कित्ता र सबैभन्दा कम सिबीआईएल क्यापिटलले ३ लाख कित्ता साधारण सेयर ल्याउने तयारी गरेको छ । ज्योती लाइफ इन्स्योरेन्सको ६६ करोड रुपैयाँको ६६ लाख कित्ता सेयर आईपीओ निष्काशन गर्न बोर्डको पाइप लाइनमा रहेको छ ।
यस्तै महिला लघुवित्त वित्तीय संस्थाको ४ करोड रुपैयाँको ४ लाख कित्ता रहेको छ । उक्त कम्पनीले आईपीओ निष्काशन गर्नको लागि बोर्डबाट अनुमति समेत पाइसकेको छ । कम्पनीले भोली (शुक्रबार)देखि आईपीओ निष्काशन गर्ने तयारी गरेको छ । त्यस्तै बोर्डबाट आईपीओ निष्काशन गर्नको लागि रुरु जलविद्युत परियोजनाले अनुमति पाएको छ ।
रुरु जलविद्युत परियोजनाले पहिलो चरणमा फागुन ७ गतेबाट ४ लाख ७ हजार ७०५ कित्ता सेयर आयोजना प्रभावीगत गुल्मी जिल्लाका स्थानीयलाई निष्काशन गर्ने भएको छ ।
परियोजनाले ८ लाख १५ हजार ४११ कित्ता आइपीओ निष्काशन गर्न बोर्डबाट अनुमति पाएपनि पहिलो चरणमा १० प्रतिशत सेयर आयोजना प्रभावितलाई निष्काशन गर्ने भएको छ । दोस्रो चरणमा सर्वसाधारणलाई २० रुपैयाँ प्रिमियम थपेर प्रतिकित्ता १२० रुपैयाँकादरले ४ लाख ७ हजार ७०६ कित्ता आइपीओ निष्काशन गर्ने तयारीमा रहेको छ ।
वि.सं.२०७७ माघ ३० शुक्रवार १०:२९ मा प्रकाशित
