काठमाडौं । नेपाल राष्ट्र बैंकले विद्युतीय भुक्तानीबाट हुने कारोबार सीमालाई बढाएको छ । राष्ट्र बैंकले भुक्तानी प्रणाली सम्बन्धी एकीकृत निर्देशन २०७७ लाई संशोधन गर्दै कारोबारको सीमा बढाएको हो । केन्द्रीय बैंकले मोबाइल बैंकिङ, मर्चेन्ट बैंकिङ र एकाउन्ट ट्रान्सफरबाट हुने कारोबारको सीमालाई बढाएको हो ।
मोबाइल बैंकिङद्वारा दैनिक २ लाख रुपैयाँसम्म कारोबार गर्न सक्ने व्यवस्था राष्ट्र बैंकले गरेको छ । २०७७ भदौ ११ गते जारी गरेको निर्देशिकामा प्रतिदिन १ लाख रुपैयाँ भुक्तानी गर्ने व्यवस्था रहेको थियो । यस्तै मर्चेन्ट बैंकिङद्वारा गरिने कारोबारको सीमालाई बर्ढार प्रतिदिन २० लाख रुपैयाँ पुर्याइएको छ ।
यो सीमा यसअघि दैनिक १० लाख रुपैयाँ कारोबार गर्ने व्यवस्था रहेको थियो । केन्द्रीय बैंकका अनुसार इन्टरनेट बैंकिङ (एकाउन्ट ट्रान्सफर) को सिमा बढाएर दैनिक २० लाख रुपैयाँ दैनिक कारोबार गर्न सक्ने व्यवस्था गरेको छ । यसअघि यो सीमा दैनिक १० लाख रुपैयाँ रहेको थियो ।
वि.सं.२०७७ फागुन १९ बुधवार १८:३० मा प्रकाशित