काठमाडौं । केही समय यता बैंकहरु कर्जा लगानीमा निकै आक्रमक रुपमा लागिपरेका छन् । कोरोनाले लामो समय सिथिल बनेको अर्थतन्त्र क्रमैसँग चलायमान हुन थालेसँगै बैंकहरु कर्जा लगानीमा आक्रमक बन्न थालेका छन् ।
कोरोना कहरको समयमा बैंक तथा वित्तीय संस्थाको अधिकांश लोन सेयर धितोकर्जामा जाने गरेको थियो । त्यो बेला बैंकहरुले लगानीकर्तालाई बोलाइ बोलाइ सेयर धितोमा कर्जा दिने गरेका थिए । जुन समयमा नेप्से इक्डेक्सको साथै कारोबार रकम पनि निकै बढेको थियो । अहिले बैंक तथा वित्तीय संस्था बाट अन्य क्षेत्रमा कर्जा बढी जान थालेपछि त्यसको केही असर सेयर बजारमा देखिने जानकारको भनाइ छ ।
नेपाल बैंकर्स संघको तथ्यांकअनुसार वाणिज्य बैंकहरुको एक सातामा २७ अर्ब रुपैयाँ कर्जा लगानी गरेका छन् । चैत १२ गतेसम्म बैंकहरुले ३४ खर्ब ६२ अर्ब रुपैयाँ कर्जा प्रवाह गरेका छन् । चैत ६ गतेसम्म बैंकहरुले ३४ खर्ब ३५ अर्ब रुपैयाँ कर्जा प्रवाह गरेका थिए । एक सातामा नै २७ अर्बले कर्जा लगानी बढेको छ ।
बैंकहरुले कर्जा लगानी जुन अनुपातमा बर्ढाका छन् निक्षेप संकलन सोही अनुपातमा गर्न नसकेको तथ्याङकले देखाएको छ । एक सातामा बैंकहरुमा निक्षेप संकलन जम्मा १० अर्ब रुपैयाँले मात्रै बढेको छ । चैत १२ सम्म बैंकहरुले ३८ खर्ब ५० अर्ब रुपैयाँ निक्षेप संकलन गरेका छन् । चैत पहिलो सातासम्ममा ३८ खर्ब ४० अर्ब रुपैयाँ निक्षेप संकलन गरेको संघको भनाइ छ ।
वि.सं.२०७७ चैत १७ मंगलवार १०:५३ मा प्रकाशित