काठमाडौं । नेपाल राष्ट्र बैंकका गभर्नर महाप्रसाद अधिकारीले क्यूआर कोड सेवाले भुक्तानी प्रणालीमा आधुनिकीकरणको सुरुवात गरेको बताउनुभएको छ ।
नेपालगञ्ज स्थित पवित्र वागेश्वरी मन्दिरमा माछापुच्छ्रे बैंकद्वारा संचालन गरेको क्युआर कोड सेवाको उद्घाटन गर्दै गभर्नर अधिकारीले यस्तो बताउनुभएको हो ।
क्यूआर कोड मार्फत भेटी चढाई उक्त सेवाको सुरुवात गर्दै अधिकारीले कोड सेवा अत्यन्त सरल र सुरक्षित रहेको र यो सेवाको प्रयोगबाट नयाँ नोटको छपाईका लागि हरेक वर्ष देशबाट बाहिरिने ठुलो धनराशी कटौती हुने हुदाँ सरकारलाई समेत यसबाट प्रत्यक्ष लाभ पुग्ने बताउनुभयो ।
माछापुच्छ्रे बैंकले उक्त कोड सेवा भुक्तानी प्रणालीमा आधुनिकीकरणको सुरुवात गरेको भन्दै यस प्रणालीले कारोबारमा पारदर्शिता ल्याउने अधिकारीले बताउनुभयो । सोही अवसरमा बेंकले पछिल्लो समय देशका धेरैजसो स्थानहरुमा आक्रमक रुपमा क्यूआर सेवा प्रदान गर्दै आइरहेको भन्दै प्रशंसा समेत गर्नुभयो ।
माछापुच्छ्रे बैंकले आजै नेपालगञ्जको पवित्र स्थल वागेश्वरी मन्दिरमा क्यूआर कोड सेवा सुरु गरेको हो । बैंकले देशका विभिन्न स्थानहरुमा रहेका तरकारी बजार, हाटबजार, होमस्टे, मन्दिर, रेष्टुरेन्ट, कस्मेटिक पसलहरु, यातायात सेवाहरु लगायतका विभिन्न व्यसायीहरुलाई प्रदान गरेको क्यूआर कोड सेवाले आम ग्राहकलाई डिजिटल कारोबार गर्न प्रोत्साहन गरिरहेको छ ।
वि.सं.२०७८ वैशाख ३ शुक्रवार १५:०५ मा प्रकाशित
