काठमाडौं । नेपाल बैंकर्स संघले सम्पूर्ण ग्राहकलाई डिजिटल बैंकिङ्गको प्रयोग गर्न अनुरोध गरेको छ ।
डिजिटल बैंकिङ्ग प्रयोग गर्दा कुनै समस्या आएमा वा सहयोग आवश्यक परेको खण्डमा सम्बन्धित बैंकमा फोन वा इमेल मार्फत सम्पर्क गर्न आग्रह गरेको छ । बैंकहरुका सबै एटिएम खुला रहनुका साथै बैंकका कल सेन्टरहरु समेत कार्यालय समयभर उपलब्ध हुने जनाएको छ ।
‘ग्राहकहरुको स्वास्थ्यलाई ध्यानमा राख्दै शाखाहरुमा भिडभाड नगर्न तथा जोखिम कम गर्नका निमित्त निषेधाज्ञा अवधिभरका लागि बैंकका शाखाहरु मार्फत निम्नअनुसार अत्यावश्क सेवामात्र प्रदान गरिने व्यहोरा जानकारी गराउदछौं’ संघद्वारा जारी विज्ञप्तिमा उल्लेख छ ।
यो अवधिमा खाताबाट नगद झिक्ने, खातामा नगद जम्मा गर्नु परेको ५० हजार भन्दा माथि मात्रै तथा रकम स्थानान्तरण, विप्रेषण भुक्तानी र अन्तर्राष्ट्रिय व्यापार जस्ता सेवा उपलब्ध रहेको छ । अन्य केही जरुरी भएमा बैंक शाखाका सम्पर्क व्यक्तिहरुको विवरण शाखा कार्यालय तथा बैंकको वेवसाइटमा समेत उपलब्ध हुने बताइएको छ ।
वि.सं.२०७८ वैशाख ३० बिहीवार १८:०० मा प्रकाशित
